O Pleno do Concello de Poio aprobou a apertura do proceso para adxudicar o novo contrato da auga, que terá un valor estimado de 54,8 millóns de euros e unha duración de 25 anos.
O goberno do PP, encabezado polo alcalde Ángel Moldes, destaca que o contrato permitirá investir 15,4 millóns en obras de ampliación das redes de abastecemento e saneamento, e asegura que se seleccionará a mellor oferta mediante procedemento aberto.
Os dous primeiros anos non haberá cambios nas tarifas, pero a partir do terceiro ano realizarase unha actualización do 34%, vinculada ao IPC acumulado desde 2014 e ao IVE.
Moldes defendeu que a nova concesión contribuirá ao crecemento de Poio e garantiu a transparencia do proceso, afeándolle á oposición as "mentiras" difundidas sobre o contrato.
A oposición, composta por PSOE e BNG, amosou o seu rexeitamento. O Grupo Socialista, a través do seu portavoz Gregorio Agís, votou en contra do expediente e advertiu da subida "inxusta e desproporcionada" das tarifas, que podería superar o 800% segundo as táboas facilitadas polo propio goberno.
Segundo Agís, un fogar medio pasará de pagar 36,93 euros a 81,53 euros despois do inicio das actualizacións, e as vivendas con traídas ou pozos subirán de 15,32 euros a 47,27 euros.
O PSOE denuncia tamén que o contrato permite que o Concello soporte os custos de reparacións de grandes dimensións e critica a ausencia de prazos claros para estas actuacións.
Tamén se reclama que se incorporen bonificacións sociais para os colectivos vulnerables, así como a creación dunha auditoría externa independente que supervise a execución do contrato e blinde a transparencia.
A oposición considera que o modelo do PP é inxusto porque non diferencia entre negocios grandes e pequenos, o que supón pagos desproporcionados para autónomos e pequenas empresas.
No pleno tamén se aprobou unha operación de amortización anticipada da débeda municipal por importe de 1,2 millóns de euros, reducindo así a débeda nun 40% desde 2023, segundo explicou o alcalde.
O goberno local destacou que se pagaron máis de 1,6 millóns en facturas pendentes do anterior mandato sen afectar servizos públicos nin renunciar a investimentos.