Este venres 24 de maio, a partir das 20.30 horas, está convocada unha manifestación por parte do BNG de Soutomaior polas rúas de Arcade.
Esixen ao Partido Popular que se paralicen os recortes e que desde a administración autonómica se dote de máis persoal sanitario ao centro de saúde de Arcade e en especial ao servizo de Pediatría.
A marcha iniciarase no cruce de Pierres, na avenida Xosé Solla. O percorrido continuará ata o centro de saúde.
O BNG sinala que a Xunta optou por poñer "parches" que non responden á situación que vive o municipio.
Alertan de que Soutomaior leva sen contar cun profesional pediatra máis de ano e medio, desde o momento en que a Xunta decidiu non cubrir a baixa de longa duración da anterior facultativa.
Este escenario leva a que os menores do municipio que enferman teñan que desprazarse a Pontevedra para ser atendidos.
Os convocantes indican que neste momento hai tres médicos de medicina de familia no centro de saúde, número que consideran "escaso" e temen que no verán este espazo sanitario quede cun só profesional médico ou mesmo con ningún.
José Costas, responsable local do BNG, afirma que desde a formación nacionalista leva desde decembro cunha campaña reclamando á Xunta de máis persoal nas áreas de Pediatría e Medicina de Familia en Soutomaior.