O proxecto 'Arroupa', impulsado por Cáritas Diocesana, logrou recuperar o pasado ano 113,6 toneladas de residuos téxtiles en Vilagarcía de Arousa, grazas á colaboración da veciñanza que depositou a súa roupa e calzado en desuso nos 34 puntos de recollida distribuídos por todo o municipio.
De acordo cos datos da organización, 105,9 toneladas procedían dos colectores instalados en rúas e prazas, mentres que as 7,6 toneladas restantes recolléronse no roupeiro parroquial de Santa Baia de Arealonga e os aparcadoiros do Alcampo.
'Arroupa' dá traballo a persoas en risco de exclusión social, que se encargan do baleirado dos colectores e do traslado dos residuos a unha planta que Cáritas xestiona no polígono do Tambre. Alí realízase a separación, selección, clasificación e tratamento.
O 88,5% dos residuos recuperados durante 2025 puido ser reutilizado ou reciclado, ben como pezas de segunda man acondicionadas para a súa venda ou como materia téxtil para novos usos.
Só o 9,5% descartouse por non ser apto para reciclaxe nin reutilización, e o 2% restante correspondeu a outros materiais (papel, cartón ou plástico) que foron tratados pola empresa Coregal.
O proxecto pecha o ciclo coa venda das pezas recuperada sen bo estado nas tendas solidarias, onde ademais xeran novos postos de traballo.
Desde outubro de 2025, Vilagarcía conta coa súa propia tenda 'Arroupa' na rúa Castelao, a segunda da provincia de Pontevedra.
Neste establecemento, os clientes poden adquirir roupa en bo estado a prezos alcanzables, e ao mesmo tempo, os usuarios de Cáritas poden recoller pezas mediante un sistema de código QR, que lles permite facelo de forma discreta e sen estigmatización.
Ademais do persoal de atención, a tenda dá emprego a unha costurera que se encarga de arranxar a roupa.
Cáritas lembra que proxectos como 'Arroupa' promoven a inclusión social a través do emprego e contribúen á protección do medio ambiente. Ao recuperar, reciclar e reutilizar a roupa, evítase a súa incineración e redúcese a emisión de CO2 á atmosfera.
Desde 2015, o Concello de Vilagarcía colabora con esta iniciativa eximindo a Cáritas do pago da taxa de ocupación polos colectores situados en solo público.
Engade Pontevedra Viva como fonte preferida de Google de balde
Mantente informado coas últimas noticias de actualidade.