A Federación pola Igualdade das Mulleres da Provincia de Pontevedra (FEMUPO) celebrou este sábado a quinta edición dos seus premios anuais na Finca Batacos.
O evento reuniu a profesionais de diferentes sectores para sinalar iniciativas vinculadas ao desenvolvemento social, cultural e económico da provincia.
O Centro de Información á Muller (CIM) da Lama, Cerdedo-Cotobade e Fornelos de Montes recibiu o galardón na categoría de Administración.
As responsables do servizo, Adriana Fontaíña e Galiza Aguete, acompañadas polo alcalde da Lama, David Carrera, recolleron a distinción que valora a actividade de asesoramento e protección das mulleres no ámbito rural.
No apartado cultural, a organización premiou a Montse Betanzos. A colareira do Grove foi recoñecida pola súa vinculación a un oficio artesanal tradicional do litoral galego.
No ámbito empresarial, a distinción recaeu en Raquel Touceda, responsable de Fresas Touceda na Estrada, pola súa actividade no sector agroalimentario.
O listado de recoñecementos completouse coas seguintes categorías:
Asociacionismo: Asociación Albor Mulleres Rurais de Valga.
Deporte: Veteranas do Club de Remo Vila de Cangas.
O acto contou coa participación da conselleira de Política Social e Igualdade, Fabiola García. Durante a súa intervención, a representante autonómica informou sobre o funcionamento da plataforma "Presentes", unha ferramenta dixital que suma máis de 2.000 perfís profesionais co obxectivo de facilitar a visibilidade das mulleres en todos os sectores da sociedade.