Continúa dando pasos o programa de Intervención do farmacéutico en materia de violencia de xénero do Colexio de Farmacéuticos e a Unidade de Violencia contra a Muller da Subdelegación do Goberno en Pontevedra.
A través deste programa, a profesión farmacéutica participa activamente en distintas accións de información, prevención e sensibilización en materia de violencia de xénero.
A última celebrouse en Caldas de Reis este xoves 22 de xaneiro e a seguinte está prevista para o 5 de febreiro en Vilagarcía de Arousa.
O subdelegado do Goberno en Pontevedra, Abel Losada, destacou en Caldas o importante papel que poden ter os farmacéuticos na detección e axuda a mulleres vítimas, debido á súa proximidade ao paciente.
Puxo o foco especialmente no caso dos farmacéuticos rurais, onde, en moitas ocasións, o farmacéutico comunitario é o único profesional sanitario ao que estas mulleres poden acudir en busca dun espazo seguro.
Nestes encontros, pioneiros en Galicia, danse cita farmacéuticos das farmacias e dos centros de saúde dos municipios das comarcas, a presidenta do Colexio de Farmacéuticos de Pontevedra, Beatriz García, e a xefa da Unidade de Violencia contra a Muller dependente da Subdelegación do Goberno en Pontevedra, María José Rodríguez.
Tamén acoden responsables dos diversos centros de información á muller e membros do equipo Viogen da Garda Civil e da Policía Nacional.
Beatriz García destaca que con estes encontros preténdese "mellorar a coordinación" entre todos os axentes intervintes en materia de violencia, "póndonos cara e permitindo que cada profesional coñeza os recursos, protocolos e o traballo que realizan os demais".
Tamén se dá a coñecer a integración da farmacia na rede de puntos violeta para prevención e protección das vítimas de violencia impulsada polo Ministerio de Igualdade.