Ponte Caldelas, tras dous anos de pandemia, recupera as súas Festas das Dores en todo o seu esplendor. A vila ten por diante cinco días de troula e sen apenas descanso.
Xa desde este venres haberá atraccións para a cativada na Praza de España e detrás da Casa da Cultura e o mércores terá lugar o Día do Neno, no que as atraccións serán máis baratas.
Ás 21.30 horas horas será a actuación de Son das Tabernas e á medianoite comezará o festival Caldelas Xoven, o festival de DJ que este ano trae á Alameda de Ponte Caldelas a GFace, Del Puerto, Dumore, Enter, Rokiño, Maqui e Juanma López.
O sábado ás 13:30 horas actuará a Banda de Música de Mondariz e ás 20:00 horas será a Procesión das Dores. Ao remate, será o Festival Folclórico Internacional cos grupos EF Esperteyu (Asturias), a Asociación Coros y Danzas de Peligros (Granada) e o Grupo Folclórico Coribantes.
A noite rematará coa actuación da Orquestra Fania Blanco Show e grupo Noche de Estrellas.
Xa o domingo, o vermú estará amenizado pola Banda de Música Unión Musical de Tenorio e ás 21.30 horas terá lugar o concerto de Luar na Lubre. A noite completarase coa verbena na que será protagonista a orquestra Olympus.
Continúa a festa o luns 29 co vermú amenizado pola Banda de Música Cultural de Arcade. Ás 21.30 horas celebrarase o Festival Son de Ponte Caldelas, no que participan Acordeóns de Ponte Caldelas, Pandereteiras do Olivar, O Torreiro de Forzáns, Pandereteiras de Regodobargo e Os Xeitosos da Insua. Ao remate haberá verbena co Grupo Claxxon.
O día grande, o martes 30, a sesión vermú será coa Banda de Música de Redondela e coa tradicional procesión das Dores, ás 20.30 horas, acompañada pola Banda de Gaitas Os Coribantes, a Banda de Guerra da Brilat e por primeira vez a Escuadra de Gastadores da Brilat.
O broche de ouro das festas chegará coa tradicional verbena que se estende durante toda a noite e remata entrada a mañá, ás 8.00 horas, e que contará nesta ocasión coa actuación de tres orquestras: Miramar, Magos e América de Vigo.
A programación da Festa das Dores complétase coa I Carreira Popular Festa das Dores, que terá lugar o venres ás 20.00 horas; e cunha exhibición de kickboxing que terá lugar o luns ás 12.00 horas na Alameda de Ponte Caldelas.