A xunta reitora do Instituto Municipal de Deportes (IMD) aprobará este luns 5 de xaneiro os pregos para sacar a concurso a nova adxudicación da xestión das piscinas de Campolongo. Así llo trasladou o concelleiro de Deportes, Agustín Fernández, aos traballadores das instalacións, cos que se reuniu nas últimas horas. A intención é que a nova concesionaria poida comezar a traballar en abril.
Ata ese momento, o goberno municipal prorrogará o actual contrato con Serviocio, que finalizou o pasado 31 de decembro, para evitar que pechen as piscinas. A empresa seguirá prestando este servizo "hasta que se firme el nuevo contrato", sinala o edil socialista. A partir de aí, só continuará xestionando estas instalacións deportivas se resulta adxudicataria desta nova concesión.
Este novo concurso inclúe a xestión destas piscinas e do futuro centro lúdico e deportivo da Parda, cuxa construción deberá asumir a empresa que consiga este contrato. O investimento fixado no prego de condicións aproxímase aos seis millóns de euros. Deles, a adxudicataria deberá destinar case tres millóns a custear unha reforma integral das instalacións de Campolongo, que serán ampliadas aproveitando a totalidade da parcela.
Segundo explicou Agustín Fernández, na Parda proxéctanse piscinas ao aire libre, catro pistas de pádel ou un parque público, xunto con servizos adicionais como oficinas, cafetaría, vestiarios e un aparcadoiro para un centenar de vehículos.
Pola súa banda, a superficie das actuais piscinas de Campolongo ampliarase en 480 metros cadrados. Farao por debaixo da praza da Constitución, en dirección á igrexa. Farase unha renovación total das instalacións, que contarán tamén cunha sala de fitness e catro para actividades. Tamén se renovará a cuberta e mellorarase a accesibilidade e os plans de evacuación con ascensores e escaleiras de emerxencia.
Ademais, na actual cuberta haberá tres pistas de baloncesto e outra de fútbol sala "alguna de ellas cubierta o semicubierta", segundo o concelleiro de Deportes. En todo caso, Fernández afirmou que o proxecto podería sufrir algunha variación, xa que as empresas ofertantes poden incluír melloras neste, co obxectivo de ser mellor valorada pola mesa de contratación que decidirá que empresa gaña a adxudicación deste contrato.
O investimento fixado no prego de condicións aproxímase, entre Campongo e A Parda, aos seis millóns de euros
O anteproxecto prevé que as obras da Parda duren doce meses, mentres que a ampliación de Campolongo ten un prazo de execución de seis meses. Iso non implica que o actual complexo estea pechado todo ese tempo. Prevese unha apertura parcial cando conclúa a renovación das piscinas. "Queremos que el cierre dure lo mínimo posible y se pueda compatibilizar las obras con el uso de las instalaciones", explicou o responsable de Deportes.
Neste sentido, Agustín Fernández entende que o mellor é que o hipotético peche se produza durante os meses de verán, unha época na que baixa a actividade neste complexo deportivo e que permitiría ter a reforma rematada de cara ao outono. Sexa como sexa, será a nova empresa adxudicataria a que decida o calendario de obras e a que coordine a mellor forma para o servizo aos seus usuarios se interrompa o menor tempo posible.
A empresa que resulte gañadora deste concurso poderá explotar as dúas instalacións deportivas durante un período de 40 anos e non terá que aboar ningún tipo de canon ao Concello de Pontevedra.