As traballadoras da Pontesa, protagonistas dunha nova actividade do programa "A memoria das mulleres"

Pontevedra
29 de setembro 2014

A Casa da Cultura de Ponte Sampaio acollerá este xoves 2 de outubro ás 20.00 horas, un encontro no que se fará unha retrospectiva en clave de xénero da época de esplendor da fábrica. Estará presentado e moderado pola actriz Comba Campoy

Exposición "As mulleres lerezás en imaxes", do proxecto A memoria das mulleres
Exposición "As mulleres lerezás en imaxes", do proxecto A memoria das mulleres

Sete mulleres que traballaron na fábrica da Pontesa entre os anos 50 e 80 serán as protagonistas da nova actividade do proxecto A memoria das mulleres. A Casa da Cultura de Ponte Sampaio acollerá este xoves 2 de outubro ás 20.00 horas, un encontro no que se fará unha retrospectiva en clave de xénero da época de esplendor da fábrica. Estará presentado e moderado pola actriz Comba Campoy.

O acto quere ser un punto de encontro para todas aquelas mulleres da contorna empregadas na Pontesa e estará aberto á intervención das persoas asistentes.

Durante case catro décadas, destacan desde a Concellaría de Patrimonio Histórico, moitas mulleres da área de Pontevedra concentraron a súa forza de traballo na fábrica da Pontesa, unha das máis modernas e avanzadas nos seus comezos e protagonista de protestas laborais nos últimos anos.

Desde crear as pezas de cerámica ata decoralas, barnizalas ou empaquetalas, mozos e maioritariamente mozas aprenderon a traballar nun incipiente modelo industrial organizado en seccións, con primas e control de produtividade así como unha cadea de mando definida, algo que pouco tiña que ver cos labores que viñan desempeñando as mulleres tradicionalmente na zona, vinculados á terra, ao mar ou a oficios como a costura.

A través dunha conversa con algunhas destas mulleres empregadas da Pontesa, esta mesa redonda busca coñecer o cambio social e persoal que supuxo para elas e a contorna ter un traballo deste tipo en tempos nos que a muller tiña máis dificultades para acceder a un posto asalariado.

Ademais acompañarán coas súas narracións persoais a historia da fábrica e axudarán a botar unha ollada á parte humana que se agochaba tras das paredes da mítica Pontesa.

O acto estará aberto á intervención dos asistentes.