Despois de dúas xornadas moi negativas na área sanitaria de Pontevedra e O Salnés, con 51 novos contaxiados de coronavirus entre os dous días, o balance oficial ofrecido este martes 25 de agosto pola Consellería de Sanidade reflicte unha desaceleración no incremento de casos.
En concreto o Servizo Galego de Saúde sitúa en 147 os 'casos activos' na área pontevedresa, seis máis que o luns debido a que se rexistraron 7 novos positivos e deuse o alta epidemiolóxica a un paciente.
Deses 147 afectados, tres necesitan atención hospitalaria, ao ingresar en planta de Montecelo unha das persoas infectadas e que se une ás dúas que permanecen desde hai varios días na Unidade de Coidados Intensivos (UCI) do mesmo centro.
Por primeira vez no seu balance local, a área sanitaria incluíu tamén o número de probas PCR realizadas nas últimas 24 horas, con 144 para un total de 25.629 desde o inicio da pandemia.
As estatísticas de Pontevedra e O Salnés complétanse cos 959 pacientes que superaron o Covid e os 17 falecementos asociados ao virus.
No que respecta a Galicia, a Dirección Xeral de Saúde Pública sitúa este luns os casos activos na comunidade en 2.580, o que supón un incremento de 128 con respecto ao luns. Deles 1.240 son da área da Coruña (+4), 352 da de Lugo (+31), 224 da de Ourense (+12), 147 da de Pontevedra (+6), 170 da área de Vigo (+15), 329 da de Santiago (+55), e 118 da de Ferrol (+5).
Do total de pacientes positivos, 13 están en UCI, 73 en unidades de hospitalización e 2.494 no domicilio. Por agora, en Galicia hai un total de 12.019 persoas curadas, rexistrándose 633 falecementos.
O número de PCR realizadas é de 308.162.