A Rúa do Santo na parroquia pontevedresa de Lourizán volvía asolagarse durante a madrugada deste martes.
A situación, denunciada repetidamente pola veciñanza, provoca que os residentes se atopen co impedimento de entrar ou saír das vivendas debido á auga que se acumula diante das vivendas con motivo de que a rede de sumidoiros emana litros de auga ao exterior cando se rexistran precipitacións copiosas.
"A situación é xa insostible, saímos a inundación por semana cos problemas de saúde, traballo, persoais e materiais, ademais das dificultades para que os rapaces poidan ir ao colexio", manifesta unha persoa residente na Rúa do Santo.
Afirman que o Concello de Pontevedra segue sen poñerse en contacto cos afectados, que viven nesta contorna preto da praza da Igrexa.
Pola súa banda, indican que os técnicos de Viaqua recoñecen que o problema os "desborda" e que a causa destas inundacións atópase no mal estado das canalizacións antigas e no atasco destas tubaxes da rede de sumidoiros.