Unha muller de 60 anos resultou ferida tras ser atropelada cando cruzaba por un paso de peóns en Portonovo.
O suceso produciuse ás 11:15 horas deste martes na Avenida de Galicia, segundo informou o Concello de Sanxenxo.
A vítima cruzaba a calzada acompañada do seu can cando un coche embestiuna e tirouna ao chan.
Sufriu un golpe na cabeza e o persoal de Urxencias Sanitarias de Galicia-061 trasladouna ao centro médico de Vilalonga.
Tras ser atendida alí, a muller, que presentaba un traumatismo cranial, foi derivada en helicóptero ao Hospital Montecelo de Pontevedra.
Ese mesmo helicóptero atopábase xa en Sanxenxo para atender ás dúas persoas que sufriron unha descarga eléctrica nun accidente laboral.
Foi na fábrica de Cerámica Campo, en Fianteira (Vilalonga), onde dous dos seus traballadores resultaron feridos.
Ambos os dous foron tamén derivados a Montecelo con cortes e queimaduras nas mans de carácter leve.