Dúas persoas resultaron feridas ao seren atropeladas por un turismo que as arrolou mentres cruzaban un paso de peóns no municipio de Soutomaior.
O suceso rexistrouse sobre as 14:50 horas no quilómetro 2,5 da estrada PO-264, que une Paredes (Vilaboa) con Arcade (Soutomaior), segundo confirmou a Subdelegación do Goberno.
Os dous peóns resultaron feridos leves.
Foron arrolados por un vehículo particular que se atopaba parado á altura do paso de peóns e que foi embestido por outro coche.
O impacto provocou que o primeiro dos coches invadise o paso de peóns mentres cruzaban as vítimas causando o atropelo.
Os catro pasaxeiros dos dous coches implicados no accidente resultaron ilesos.
Ademais, axentes da Garda Civil de Tráfico realizaron un test de alcoholemia aos dous condutores e ambos deron un resultado negativo.