A Xunta de Galicia destinará finalmente 4,1 millóns de euros á mellora da rede de saneamento do río Lameira ao seu paso por Marín, despois de que a conselleira de Medio Ambiente e Cambio Climático, Ángeles Vázquez, e a alcaldesa, María Ramallo, asinasen unha addenda ao convenio entre Augas de Galicia e o Concello.
O incremento de 500.000 euros permitirá afrontar a complexidade técnica do proxecto, que beneficiará directamente a preto de 10.000 habitantes do municipio e que estará rematado no primeiro trimestre de 2026.
Entre as actuacións principais previstas figura a renovación do colector xeral do Lameira nun tramo de 1.600 metros desde a PO-313 ata a ponte Zapal.
Tamén está prevista a construción dun novo depósito de retención que regulará os caudais das augas pluviais que chegan á estación depuradora municipal e a mellora da estación de bombeo do Lameira.
Estes traballos contribuirán a rebaixar as escorrentías que desembocan no río, especialmente en períodos de choiva intensa, e a retirar o colector do leito do río para optimizar o sistema de saneamento.
A conselleira Ángeles Vázquez destacou que Marín conta cunha ampla rede que cobre tanto a zona urbana como gran parte das áreas rurais, concentrando no ámbito portuario a maior parte dos problemas de saneamento.
As obras beneficiarán especialmente ás parroquias de San Xián de Marín e Santa María do Porto, nas que residen máis de 9.000 persoas e que aspiran a chegar a 10.000 usuarios no horizonte de 2042.
No deseño das intervencións, tivo especial relevancia o criterio de humanización dos espazos, co obxectivo de que toda a veciñanza de Marín, que ten manifestado as súas queixas polo atraso nas obras, poida acceder a esta contorna fluvial unha vez finalicen os traballos.