O deputado nacionalista Paulo Ríos trasladou ao Parlamento galego as demandas veciñais sobre o estado das obras de saneamento do río Lameira en Marín, que acumulan máis dun ano de retraso respecto ao calendario inicial.
Tras visitar a zona afectada, Ríos constatou que diversas parcelas permanecen abertas e sen muros de delimitación desde hai máis de dous anos, especialmente na contorna do centro educativo CEIP Sequelo.
Esta situación compromete tanto a seguridade estrutural como a privacidade dos propietarios das vivendas limítrofes.
O deputado rexistrou unha batería de preguntas dirixidas á Consellería de Medio Ambiente para esixir medidas urxentes que solucionen os problemas derivados da paralización dos traballos.
Segundo o BNG, os atrasos teñen provocado múltiples denuncias por contaminación ambiental ante o SEPRONA debido ás verteduras recorrentes ao río.
A conselleira Ángeles Vázquez xa recoñeceu publicamente en marzo os atrasos das obras, que inicialmente debían rematarse nesa data, e comprometérase a executar os peches das parcelas cando mellorara a climatoloxía. Porén, seis meses despois a situación mantense inalterada.
O grupo municipal do BNG tamén leva meses reclamando solucións ao goberno local do PP, mentres os veciños continúan soportando as consecuencias dunha actuación que se aestende no tempo sen visos de conclusión.
Ríos instou a Augas de Galicia a intervir para evitar novos episodios de contaminación e reclamou acelerar a execución antes da chegada do outono para minimizar o impacto ambiental e social do proxecto.