A Policía Local de Pontevedra localizou e prestou axuda a noite do martes 7 de xullo a unha ciclista que resultou ferida tras sufrir unha caída.
A intervención policial comezou despois de que o servizo de emerxencias sanitarias 061 solicitase apoio para atopar a muller, quen dera o aviso do accidente pero non fora quen de indicar o punto exacto no que se atopaba, na contorna das marismas da Xunqueira da Gándara.
Os axentes organizaron un dispositivo de rastrexo por diferentes espazos da zona. A partir das indicacións facilitadas por teléfono pola propia afectada e polos seus familiares, as patrullas lograron dar co seu paradoiro na parroquia de Campañó, onde se atopaba deitada no chan.
O persoal sanitario atendeu a ciclista no mesmo lugar do accidente e despois conduciuna a un centro hospitalario debido a unha dor intensa no ombreiro. Alí determinouse que presentaba unha fractura na clavícula dereita provocada polo impacto co chan.
DETIDO
Noutro servizo policial, os axentes detiveron o sábado 4 de xullo un home acusado de cometer dous roubos no municipio.
O primeiro dos furtos produciuse no interior dunha autocaravana, de onde levou dúas carteiras, e o segundo tivo lugar nun vehículo de repartimento, do cal subtraeu un teléfono móbil.
Engade Pontevedra Viva como fonte preferida de Google de balde
Mantente informado coas últimas noticias de actualidade.