A Asociación de Vivendas Turísticas de Galicia (Aviturga) saíu ao paso do recente anuncio do presidente do Goberno sobre a retirada de máis de 53.000 vivendas do mercado turístico, asegurando que a afirmación "non pode estar máis lonxe da realidade".
O debate sobre o futuro das vivendas turísticas está servido. Por unha banda, o Executivo defende a súa actuación como parte dunha estratexia para equilibrar o mercado e frear a escalada de prezos do aluguer. Por outro, desde Aviturga ven un ataque directo a propietarios que, aseguran, non están dispostos a asumir unha función social que corresponde ao Estado.
Desde Aviturga, insisten en que esas vivendas non son ilegais, aínda que non estean inscritas no rexistro estatal obrigatorio. Sosteñen que deberá ser cada comunidade autónoma a que determine si unha vivenda pode ou non operar como turística, e non o Goberno central quen o decida de forma unilateral, explican. O único efecto inmediato, aseguran, é que estas propiedades non poderán anunciarse en plataformas como Airbnb ou Booking até regularizar a súa situación.
Ademais, Aviturga dúbida seriamente de que todas esas vivendas vaian volver ao mercado residencial, como suxire o Executivo. "Argumentar que ditas propiedades pasarán a ocuparse por mozos e familias só se cumprirá, unha vez se derrogue a actual Lei de Vivenda e se restableza a seguridade xurídica que de garantías aos arrendadores", sinalan. E advirten de que os efectos inmediatos serán "que esas propiedades pasen a alugarse por curta estancia ou directamente pasen a incrementar o parque de vivendas pechadas baixo sete chaves polos propietarios".
Para a asociación, todo isto responde a unha estratexia que, segundo denuncian, busca desprestixiar e perseguir o modelo de negocio das vivendas turísticas. Van máis aló e acusan directamente ao Goberno de "desviar a mirada dunha nefasta xestión de vivenda" e de "obedecer aos requirimentos dos hoteleiros e fondos de investimento, que descubriron en edificios completos de vivendas turísticas un novo filón".
"O que o presidente pretende é que as familias españolas que adquiriron co esforzo do seu traballo unha segunda vivenda suplan agora, unha función social responsabilidade do goberno, á conta dos seus petos", critican desde Aviturga.
Temen ademais que o resultado final sexa o aumento de vendas a compradores estranxeiros, sobre todo en zonas costeiras e turísticas. Isto non só deixaría sen oferta a quen realmente usan estes aloxamentos, senón que afectaría a toda a economía local que vive do turismo.
O GOBERNO DEFENDE A MEDIDA
Pola súa banda, o subdelegado do Goberno en Pontevedra, Abel Losada, defendeu a actuación do Ministerio de Vivenda como unha medida "valente e pioneira en Europa". Asegura que responde o obxectivo de pór orde nun mercado descontrolado e contribuír a solucionar o problema do acceso á vivenda.
Na súa intervención, Losada destacou que xa se deron de baixa 1.249 vivendas turísticas na provincia de Pontevedra. En Vigo hai 227, en Sanxenxo 196, en Pontevedra cidade 111… e así até 50 dos 61 municipios da provincia, segundo detallou.
Estas cifras non son anecdóticas, asegurou, son un primeiro paso para devolver ao mercado residencial vivendas que estaban atrapadas nun modelo que escapara a toda regulación.
O subdelegado tamén lanzou un dardo á Xunta de Galicia, á que acusou de facer "a vista gorda" durante anos ou manter unha actitude "obstrucionista".
Para Abel Losada, o Goberno central está a cumprir coa súa parte: regular, protexer e facilitar o acceso a unha vivenda digna. E agora tócalle ás comunidades autónomas facer o mesmo.