As táboas do Teatro Principal foron escenario este mércores do último baile do sexto mandato de Miguel Anxo Fernández Lores como alcalde de Pontevedra. O sábado, salvo sorpresa maiúscula, o rexedor nacionalista iniciará o sétimo. Como indican as normas, esta mañá tocaba celebrar o último pleno do ciclo político e disolver unha corporación que o día 17 volverá constituírse. Chegarán novos nomes, pero hoxe seis concelleiros dixeron adeus á súa etapa como representantes da cidadanía pontevedresa. E moitos foron incapaces de conter a emoción.
Cos ollos vidriosos e ao finalizar a sesión, o xa exteniente de alcalde Tino Fernández, fixo repaso da súa longa traxectoria como integrante da corporación municipal. "Foi unha tremenda honra ser concelleiro de Pontevedra todos estes anos, aprendín moito e coñecín xente marabillosa. Un vaise con sabor agridoce porque quedan cousas por facer, pero non creo que en política haxa algo máis importante que estar preto dos teus veciños", despediuse o socialista.
Con todo, Fernández, que se tomará todo o verán de vacacións antes de retomar a súa profesión como avogado, quixo dar un último consello aos seus sucesores, que estes días negocian a formación do futuro goberno local. "Nas negociacións, pola miña experiencia, hai bastante teatrillo. Hai unha cultura de coalición que non creo que se vaia romper. Ou PSOE ten que presionar porque sacou un concelleiro máis e ou BNG terá que ser receptivo porque sacou dous menos", resume o anterior líder socialista de Pontevedra convencido de que finalmente haberá acordo.
Aínda máis emocionada e sen poder conter as bágoas dixo adeus a nacionalista Carmen Fouces. "Nunca esperas ser concelleira da tua cidade e cando o es ata te emocionas. Agradezo a todo o mundo por todas as cousas. E o que lle digo á xente que queda é moita forza e moito sentidiño. Hai moito que facer", rematou.
Do Partido Popular conclúe o seu ciclo Ana Isabel Vázquez, que pecha a súa segunda etapa como concelleira da súa cidade. "Fixemos todo o que poidemos por poñer o noso gran de area para que Pontevedra siga avanzando. Deséxolle o mellor aos que quedan en todos os partidos, todos temos que arrimar o ombreiro para seguir loitando por ela".
Agradecidos mostráronse tamén Alberto Oubiña e Pilar Comesaña, do BNG. A veterana concelleira pon punto e final a 12 anos de servizo que lembrará "como un pracer enorme, levo un recordo moi grato".
A sesión, baleira de calquera tipo de contido de relevancia, foi sen dúbida a máis curta do mandato. En pouco máis de dez minutos resolvéronse un pleno e cinco comisións, cuxas actas foron aprobadas por unanimidade.
O único que falou foi o alcalde Lores, quen felicitou a todos os membros da corporación e mostrouse convencido de que "todos estamos por mellorar a cidade sen importar as diferenzas políticas". Nun intento de saltarse o guion, o rexedor quixo darlle a palabra aos líderes de cada unha das formacións para que se despediran do mandato, pero a rixidez do regulamento e a firmeza do secretario, que non quixo mirar para outro lado, impediron a valoración final de Rafa Domínguez e Iván Pueontes.
A sesión levantouse cun agasallo para cada un dos edís, consistente nun pin de Santa Clara, o libro da exposición "A cidade e a pegada" e unha medalla. Os únicos que non puideron asistir ao pleno foron a nacionalista Carme da Silva e o popular Gerardo Pérez Puga.