A concellaría de Servizos Sociais e Maiores de Sanxenxo convida os residentes da terceira idade a celebrar por anticipado a chegada de 2026 co "Baile Pre Fin de Ano de Maiores".
Tras o éxito da súa primeira edición, esta cita quere ser un espazo de convivencia e diversión, programada para o domingo 28 de decembro a partir das 18:30 horas, baixo a carpa da Aldea do Nadal.
A velada promete unha tarde festiva onde non faltarán os doces nin as tradicións.
Os asistentes poderán repoñer forzas cunha merenda de roscón e chocolate, para logo gozar dunhas simbólicas badaladas que, acompañadas de uvas e cotillón, despedirán simbolicamente o ano nun ambiente de alegría.
Paz Lago, responsable da concellaría, subliña a importancia destes encontros: "É unha cita para gozar, compartir e pasalo moi ben. Este baile chegou á programación para quedar. Os nosos maiores meréceno".
O Concello destina anualmente preto de 44.000 euros a actividades de lecer e aluguer de espazos para os Clubs de Xubilados de Noalla, Sanxenxo, Portonovo e Vilalonga, promovendo a socialización e a calidade de vida da poboación de máis idade do municipio.