Na tarde deste venres, 17 de outubro, a Praza da Peregrina de Pontevedra acolleu unha concentración convocada pola Plataforma Parar a Guerra-Pontevedra, baixo o lema "Palestina Libre!" e "Por unha paz xusta! Non ao xenocidio!".
A acción demandaba un alto ao fogo definitivo en Gaza e rexeitaba tanto o terrorismo de Hamás como o xenocidio de Israel.
O acto rexistrou un baixo número de participantes.
A convocatoria, que tivo lugar ás 19:00 horas, buscaba manifestar a solidariedade da sociedade civil e o seu compromiso coa creación dun Estado de Palestina e unha paz duradeira.
O xornalista pontevedrés Juan de Sola interveu no acto, que se desenvolve nun contexto de incerteza internacional malia "o raio de esperanza" que se estableceu, segundo os organizadores, co Cumio de Exipto presidido por Donald Trump e Al Sisi.
Ao acto acudía o portavoz municipal socialista Iván Puentes, entre outros representantes do PSOE na comarca.