O Museo de Pontevedra vestiu de gala para acoller a XXVII edición dos Premios Emprende, unha cita organizada cada ano pola Asociación de Xóvenes Empresarios (AJE), presidida por Valeria Giráldez.
O evento volveu pór en valor o talento, a innovación e a valentía de quen deciden apostar por crear e crecer desde a provincia.
A gala, marcada polo espírito emprendedor e a proximidade entre xeracións, volveu demostrar que Pontevedra latexa con forza grazas ás súas pequenas grandes ideas, esas que nacen nos talleres, cociñas e estudos de quen cren que innovar tamén é unha forma de coidar o territorio.
O Premio Xoven Empresario do Ano recaeu na firma Birdmind, unha empresa con sede no polígono do Campiño que soubo converter a sustentabilidade no seu aceno de identidade.
"Reinventamos a maneira en que entendemos os materiais", proclaman na súa web. A súa proposta consiste en transformar residuos en taboleiros ecolóxicos de alta calidade, un modelo de negocio que rompeu esquemas no sector da carpintaría e os materiais sostibles.
Pola súa banda, o galardón á Mellor Iniciativa Emprendedora 2025 foi para Rumbo Norte Foods, unha nova empresa conserveira situada no polígono de Barro.
A firma revolucionou o mercado coa súa aposta pola tecnoloxía consistente en que cada envase inclúa un código QR que conecta ao consumidor coa orixe do produto, receitas, vídeos e experiencias turísticas relacionadas coa gastronomía galega.
O xurado tamén quixo recoñecer outras propostas destacadas con mencións de honra.
Na categoría de innovación, o galardón foi para Suas Movemento, un centro pontevedrés que ofrece adestramento especializado para mulleres en distintas etapas da súa vida, desde o embarazo até o posparto.
A mención de honra á responsabilidade social empresarial foi para A Ecogranxa, un proxecto turístico situado en Riomouro (Poio) que promove a autosuficiencia, a vida en contacto coa natureza e a rehabilitación de casas rurais como espazos de descanso e desconexión.
O toque máis emotivo da noite púxoo o premio honorífico, concedido ao histórico bar O Canón de Pau, todo un clásico na praza de Barcelos.
Aberto desde 1984, este negocio familiar de comida caseira recibiu o recoñecemento pola súa traxectoria e o seu papel como punto de encontro que dá vida á cidade.