O goberno municipal de Pontevedra está convencido de que 2021 será o ano da "reactivación económica" tras a crise xerada pola pandemia da covid-19. Para iso, BNG e PSOE pactaron un orzamento "expansivo" que superará os 100 millóns de euros.
"Estamos moi contentos do acordo que alcanzamos", sinalou o alcalde de Pontevedra, Miguel Anxo Fernández Lores, que compareceu este venres co tenente de alcalde, o socialista Tino Fernández, para presentar as contas municipais para o próximo ano.
Pontevedra aprobará inicialmente un orzamento consolidado de 80.734.000 euros, "o máis alto da historia", destacou Fernández Lores. Unha vez se liquide o orzamento de 2020 incorporaranse todos os remanentes, que superarán os 20 millóns de euros.
Con estas cifras, o Concello poderá "como mínimo" triplicar o investimento medio realizado nos últimos anos, defendeu o alcalde pontevedrés. Este "gran esforzo investidor" do Concello, engadiu, "permitirá xerar uns 2.000 postos de traballo" en todo o municipio.
A maior partida destes orzamentos será o gasto corrente, que supoñerá uns 38,5 millóns de euros. O aumento susténtase especialmente nos gastos xerados pola covid-19, que supuxeron máis dun millón, e na absorción do Pazo da Cultura.
Para persoal, tras a subida do 0,9% prevista para todos os empregados públicos, o Concello deberá reservar uns 24,8 millóns de euros.
No capítulo de ingresos, segundo detallou o alcalde de Pontevedra, prevese un incremento de 1.328.000 euros con respecto a 2020, a pesar de conxelar as taxas por sétimo ano consecutivo. Débese, subliñou, ao aumento da actividade económica, ao incremento da poboación e á actualización dos censos para combater a fraude.
En concreto, 30,3 millóns ingresaranse a través de impostos directos, mentres que outros 3 millóns serán por impostos indirectos. En taxas prevense recadar 20,7 millóns e outros 20,9 millóns chegarán como participación nos ingresos do Estado. Preto de 4,8 millóns serán achegados por outras administracións.
Na súa primeira fase, o orzamento municipal de Pontevedra recolle 12,9 millóns de euros en investimentos directos. Haberá partidas cuantiosas para avanzar en materia de accesibilidade urbana e rural, para a renovación do Centro Sur, para a reforma de Mollavao, para xardíns e zonas verdes ou para o plan Supera21, que alcanzará o millón de euros.
ORZAMENTO "PENSADO PARA AS PERSOAS"
O tenente de alcalde, Tino Fernández, destacou pola súa banda que o orzamento municipal para 2021 está "pensado para as persoas" e traza, segundo o líder socialista, unha "folla de ruta clara" para que sexa o ano do "rebote" e da "esperanza".
"Foi moi fácil chegar a acordos", sinalou Fernández, que defendeu que estas contas demostran que Pontevedra ten un goberno "engraxado e que funciona". Defendeu que o resultado final destas negociacións deixa aos socialistas "razoablemente satisfeitos".
O executivo municipal, dixo, "non deixará a ninguén atrás" e para iso "faremos os esforzos que sexan necesarios". A este respecto, o dirixente do PSOE subliñou especialmente que o orzamento de 2021 será "ambicioso" desde o punto de vista social.
Tras destacar que o Concello é unha administración "que escoita aos cidadáns" e que "non busca problemas senón que achega solucións", Tino Fernández abordou a cuestión de por que non se inclúe nestas contas a exención de taxas que pedían os hostaleiros.
A pesar de que o PSOE prometeu buscar unha solución, Fernández afirmou que "nos comprometemos a escoitar" aos colectivos e iso fixeron, sinalou, ao longo de toda esta semana. Con eles, asegurou, alcanzáronse acordos "que se plasman nestes orzamentos" como as axudas Supera21 que "recollen boa parte das súas demandas".
Engade Pontevedra Viva como fonte preferida de Google de balde
Mantente informado coas últimas noticias de actualidade.