O bolso pontevedrés que estreou a princesa Leonor: "Foi unha sorpresa enorme"

A moda galega volveu a coarse no armario da princesa Leonor. Esta vez, cun bolso da firma pontevedresa Heimat Atlantica que quixo estrear en Xirona.

Foi durante a visita que a princesa fixo, acompañada da súa irmá, a infanta Sofía, ao conxunto arqueolóxico de Empúries, o único xacemento de toda a península ibérica no que conservan vestixios gregos e romanos xuntos.

Nas mans de Leonor, que vestía un sobrio traxe de chaqueta branco de liño e unha americana rosa, sobresaía un bolso 'pouch' desta marca creada en Pontevedra.

"Foi unha sorpresa enorme descubrir as imaxes", explica a súa creadora, a deseñadora Montserrat Álvarez, a PontevedraViva, porque "sabiamos que lle gustaba a marca e os nosos valores, pero nunca sabes se unha peza vai formar parte dun dos seus actos públicos".

Álvarez asegura que momentos como este se viven con moita ilusión, xa que detrás de cada peza "hai moitas persoas e moitas horas de traballo". Todos os involucrados no seu deseño, recoñece, "emocionámonos moito".

O bolso en cor morada que lucía a princesa Leonor forma parte dunha edición limitada de tan só 150 unidades, coñecida como 'The Grand Tour'.

Está confeccionado en liño, rematado con detalles en pel e acabado coa característica etiqueta bordada de identifica cada colección de Heimat Atlantica.

Neste caso forma parte dunha colección, detalla a súa creadora, inspirada nos xardíns, as cores e as paisaxes da costa atlántica. "Transmite unha sensibilidade moi ligada ao verán, ás viaxes e a unha forma pausada de gozar as cousas", subliña Montserrat Álvarez.

Que a futura raíña se fixara nunha das súas creacións "é unha enorme alegría", destaca a deseñadora, porque o vive como un recoñecemento ao traballo de todas as persoas "que creron neste proxecto desde o principio".

"Cremos que reflicte moi ben o estilo da princesa Leonor e dunha nova xeración de mulleres que buscan pezas con personalidade, pero sen excesos", afirma a responsable de Heimat Atlantica, que celebra o impacto positivo que alcanzou esta colección.

Pero máis aló da repercusión mediática, a responsable da firma pontevedresa recoñece estar emocionada ao pensar que este bolso "poida converterse nunha embaixadora da nosa creatividade, o noso deseño e a nosa forma de entender as cousas".