O alcalde de Cerdedo-Cotobade, Jorge Cubela, acompañado por representantes municipais e da Deputación de Pontevedra, presentou este xoves ante a veciñanza da parroquia de Borela o proxecto de humanización e mellora da mobilidade peonil do seu núcleo central, unha actuación considerada estratéxica e que mobilizará un investimento de 1.299.324 euros.
A intervención, largamente agardada polos habitantes da zona, centrarase na estrada provincial E.P. 0407 Borela-Ponte Caldelas, nun tramo de algo máis de 300 metros comprendido entre a praza central e a Casa do Pobo —actual Casa da Cultura Nélida Piñón—. O obxectivo é transformar este corredor viario nun espazo máis amable, seguro e accesible.
O financiamento virá da man da cooperación institucional. A Deputación achegará o 70% do orzamento e o Concello asumirá o 30% restante, ademais do custo das expropiacións necesarias. Unha aposta conxunta que, segundo destacou o rexedor, supón "un investimento histórico para Borela e un exemplo de colaboración efectiva entre administracións".
Durante a presentación, Jorge Cubela subliñou que a actuación figura entre as prioridades do goberno provincial, do que el mesmo forma parte.
"Grazas ao compromiso decidido deste novo equipo da Deputación, conseguimos que esta actuación sexa considerada unha das máis urxentes da provincia, co obxectivo de mellorar a seguridade viaria e a convivencia no núcleo de Borela", afirmou.
O proxecto inclúe a creación dunha plataforma única sobreelevada con lastros de pedra, unha solución que outorgará prioridade ao tránsito peonil e reducirá a conflitividade entre vehículos e persoas. Completaranse os traballos coa instalación de novo mobiliario urbano, zonas verdes e iluminación LED de deseño, así como co soterramento das liñas eléctricas e de telecomunicacións.
Tamén se renovará a rede de recollida de augas pluviais, configurando unha transformación integral dun espazo que posúe un importante valor social e patrimonial para a parroquia.
Cubela quixo destacar especialmente o papel do concelleiro de Borela, Bruno Portela, pola súa implicación constante.
O alcalde pechou o encontro sinalando que "o noso obxectivo é transformar Borela e mellorar a calidade de vida da súa veciñanza".
