O Concello de Bueu realizou este martes unha chamada á concienciación cidadá para lograr un maior compromiso co medio ambiente e a limpeza das praias e, desta forma, evitar situacións como a que se deu durante a pasada fin de semana no areal de Lapamán, onde se xeraron montañas de lixo nunha esquina.
Esta vertedura provocou queixas entre os usuarios da praia e o alcalde de Bueu, Félix Juncal, reaccionou aclarando que o Concello non adoita colocar as papeleiras na praia ata despois sde a celebración de San Xoán, isto é, este martes, pero que "este motivo non é escusa para que os cidadáns vertan o lixo en calquera lugar e menos nunha praia na que a escasos 30 metros hai contedores onde poderían depositar eses lixos".
Por outra banda, e ante as queixas pola sucidade de areais como as de Agrelo ou Portomaior, Juncal anunciou que o persoal de limpeza comezou este luns os traballos de mellora dos areais, polo que se agarda que nas vindeiras semanas teñan un mellor aspecto.
O Concello de Bueu conta para este verán con catro praias con bandeira azul: Area de Bon, Portomaior, Lagos e Lapamán, todas elas con augas de calidade excelente. Ademais, tras a última mostraxe da Xefatura de Sanidade da Deputación de Pontevedra, a maioría dos areais de Bueu aprobaron con matrícula de honra o estudo da calidade das augas.