O Concello de Pontevedra está a levar a cabo unha mellora na iluminación da Praza da Peregrina.
O obxectivo é realzar este emblemático espazo durante a noite.
O concelleiro de Servizos Básicos Urbanos, Xaquín Moreda, supervisou este venres os traballos que os operarios están a realizar nas fachadas dos edificios da praza, onde se están a instalar novos farois.
A intervención, cun orzamento aproximado de 16.800 euros, inclúe a substitución de todas as luminarias da zona por tecnoloxía LED, o que permitirá un aforro enerxético e unha mellor calidade de iluminación.
Ademais, engadiranse dous novos farois para incrementar a luminosidade e instalarase un novo proxector que dará luz á zona central da praza, destacando aínda máis o santuario da Peregrina.
Moreda destacou que, neste mandato, por orde do alcalde Miguel Anxo Fernández Lores, o goberno local está a centrarse no mantemento e mellora dos espazos públicos con este tipo de intervencións.
Neste sentido, xa se acometeron proxectos de cambio de iluminación a LED na zona sur da cidade, estanse a realizar na zona do Burgo en Lérez e queda pendente a zona norte da cidade por levar a cabo este cambio.
O concelleiro agarda que as novas luminarias da Praza da Peregrina entren en funcionamento a próxima semana, tras realizar as probas necesarias para asegurar que a luminosidade sexa a adecuada.
