Os novos vestiarios do campo de fútbol da Seca, en Poio, xa estarán en funcionamento esta fin de semana.
Darase resposta así unha vella reclamación de clubs e usuarios para contar con espazos "cómodos e de calidade" sen necesidade de desprazarse a outras instalacións deportivas da contorna para cambiarse, como por exemplo o campo da Reiboa ou o ximnasio.
"Estamos respondendo a unha demanda que vén de lonxe por parte de todos os equipos e deportistas, tamén nosa cando formábamos parte da oposición, dotándoos duns vestiarios acordes ás instalacións do campo de fútbol da Seca", sinala o concelleiro de Deportes, Tucho Muíños.
Así, esta fin de semana, os clubs xa poderán estrear estes novos vestiarios que estarán dispoñibles tamén para os adestramentos.
Con toda a actividade que hai no campo, onde xogan moitas categorías de diferentes clubs locais cos adestramentos e partidos ao longo de todo o día, un vestiario resultaba totalmente insuficiente e obrigaba aos equipos a desprazarse ata outros espazos da contorna, unha molestia que empeoraba en días de choiva.
A partir de agora, contarán con dous novos vestiarios, un para o equipo local e outro para visitantes debaixo da grada, onde adaptaron o espazo dos antigos baños e a sede da Socidedade Cultural Deportiva.
Cada vestiario conta con duchas, zona para cambiarse e baño. Neste proxecto investíronse máis de 40.000 euros.
Tucho Muíños destacou o obxectivo do goberno local de mellorar e ampliar as instalacións deportivas municipais.
Segundo repasou, ademais de crear estes dous novos vestiarios, tamén se corrixiron os problemas de condensación no pavillón de Lourido e se ampliouse o horario e os controis de aforo no ximnasio municipal.
O Concello asumiu ademais a concesión da nave de piragüismo de Combarro para poder facer investimentos nesta instalación, "e xa estamos a traballar para crear unha pista multi-deporte en Vilariño", engade.