O Concello de Cerdedo-Cotobade finalizou o estudo de viabilidade para a instalación dunha central de biomasa e unha rede térmica destinada a abastecer edificios públicos municipais.
Esta iniciativa, enmarcada no Proxecto Aldealix, ten como obxectivo reducir as emisións de carbono e avanzar na transición enerxética, aproveitando a biomasa residual forestal e agrícola da zona.
A rede térmica proporcionará auga quente sanitaria e calefacción a edificios como a gardería, o colexio, o almacén municipal e outras instalacións públicas.
A estación central situarase preto do Pavillón Polideportivo Municipal de Cerdedo, facilitando a distribución da calor e permitindo no futuro a súa ampliación a outros edificios e propiedades.
O alcalde, Jorge Cubela, destacou que este proxecto "contribúe á redución das emisións de carbono e á transición enerxética, valorando enerxeticamente a biomasa da zona".
Cubela subliñou que se trata dunha alternativa "viable e sostible" para a xestión de enerxías renovables, con vantaxes económicas, sociais e ambientais, xa que reducirá os custos enerxéticos e minimizará a pegada de carbono.
A próxima fase do proxecto contará con financiamento europeo a través do programa Interreg Poctep (2023-2026), o que supón un impulso importante para o seu desenvolvemento.
Ademais, segundo o goberno local, o Concello de Cerdedo-Cotobade colabora coa Xunta de Galicia a través de Agader, así como con outros concellos como Monterrei (Ourense) e os municipios portugueses de Arcos de Valdevez e Vila Pouca de Aguiar para fomentar a cooperación transfronteiriza entre Galicia e o norte de Portugal.