Un programa municipal de inserción laboral permitirá contratar 18 persoas desempregadas en Cerdedo-Cotobade.
Estes novos traballadores incorporaranse á brigada municipal de obras e medio ambiente.
Farano cunha xornada completa de sete meses de duración (maio a novembro) en postos de encofradores, podadores, pintores, un canteiro e condutores de maquinaria forestal e de camión.
Este programa de inserción conta cun orzamento de 246.804,30 euros, dos que 164.074,58 euros proveñen do Plan +Provincia da Deputación e 82.729,72 euros de fondos propios do Concello.
Segundo explica o goberno local, no proceso de selección de persoal priorizouse a persoas que estaban en situación de desemprego e a colectivos especialmente desfavorecidos dentro do mercado laboral, como poden ser vítimas de violencia de xénero, maiores de 45 anos, persoas cunha discapacidade superior ao 65%, membros de familias monoparentais con fillos a cargo, persoas con niveis de renda baixos ou aqueles que teñan cargas familiares ou baixa cualificación.
Grazas a estas incorporacións poderanse acometer reparacións urxentes, pavimentaciones, tarefas de limpeza ou a roza e acondicionamento de rutas de sendeirismo e zonas verdes.
Tamén está previsto realizar tarefas de pintado de vías e dependencias municipais, así como a mellora da sinalización horizontal en estradas de titularidade municipal.
Ademais co posto de canteiro será posible acometer reparacións de empedrados, fontes e lavadoiros.