Ata 400 prazas en escolas infantís municipais. É o compromiso que adquiriu Cidadáns, a través do seu candidato á Alcaldía de Pontevedra, Goyo Revenga.
A formación laranxa considera "lamentable" que Pontevedra non teña unha escola infantil municipal como o resto das capitais de provincia galegas porque o Concello non quixo adherirse, segundo Revenga, ao convenio ofrecido pola Xunta.
As prazas actuais para os nenos de 0 a 3 anos na cidade, engadiu o candidato de Cidadáns, resultan "do todo insuficientes" para atender á demanda existente.
Entre outras medidas no ámbito social e da educación, Cidadáns tamén realizará dúas convocatorias públicas para outorgar axudas.
En concreto, as do bono comedor para alumnos de Primaria durante todo o ano, "a fin de que non volva suceder o ocorrido este curso" en que varios escolares en situación de vulnerabilidade quedaron fóra "pola nefasta xestión do BNG", e as de axuda para material escolar dos nenos de 0 a 3 anos.
"Nunca máis quedará ningunha axuda pendente por falta de orzamento", defendeu Goyo Revenga.
Engade Pontevedra Viva como fonte preferida de Google de balde
Mantente informado coas últimas noticias de actualidade.