Pontevedra vive, segundo o alcalde, o "mellor momento da súa historia" en actividade e proxección. Así o destaca Miguel Anxo Fernández Lores na memoria que acompaña aos orzamentos municipais para 2026, que se aprobarán en pleno o próximo luns.
Pero coa certeza de que "non podemos conformarnos", Fernández Lores destaca o valor que terán para o futuro estas contas, que ascenderán aos 103,76 millóns de euros, e que nacen coa "esencia" de seguir mellorando a calidade de vida da cidadanía.
Para o alcalde pontevedrés, o goberno municipal ten claro que o "futuro verde" cara ao que debe camiñar a cidade "non é simplemente unha cuestión estética, senón un cambio de paradigma". De aí que se vaia a notar no impulso de máis proxectos ambientais.
Entre eles, Lores citou a renaturalización dos Gafos, a solución para as inundacións que provoca o rego de Valdecorvos, a renovación a LED de toda a iluminación pública ou o novo sistema de tratamento dos residuos polo que aposta Pontevedra.
A eles suma a folla de ruta para liberar a Xunqueira da Gándara ou o novo parque da Parda, que seguirán dando pasos adiante durante o 2026.
A Parda será, segundo o alcalde, un dos "epicentros" da transformación urbana durante este ano, xa que tamén se impulsará a reurbanización da pasarela de Doce de Novembro, o novo edificio municipal de emerxencias e un polígono de máis de 2.000 vivendas públicas.
2026 tamén será un ano "decisivo" para Mollavao, recorda Fernández Lores, coa reforma integral da rúa Rosalía de Castro e a apertura do novo viario na parcela dos circos, que tamén terá un tratamento específico como zona verde.
Monte Porreiro vivirá, pola súa banda, un "punto de inflexión" co novo pavillón municipal, a renovación do campo de fútbol, a nova aula TIC ou a reurbanización completa de arterias vitais como as rúas Alemaña, Irlanda, Luxemburgo e Reino Unido ou a Praza de Europa.
Dentro das actuacións prioritarias para o novo ano, o alcalde tamén cita o novo espazo de centralidade sobre a cuberta da vía do tren na Seca ou as reformas previstas en Casimiro Gómez, Luís Seoane, Rúa Serra, Juan Bautista Andrade e Augusto García Sánchez.
"Nesta visión de cidade que está a medrar, temos unha oportunidade histórica na zona norte", recordou Lores, coa transformación da Avenida de Compostela nunha vía urbana, amable e integrada na trama da cidade, acabando co "illamento" do campus universitario.
Máis aló destas obras, o alcalde garante que o seu goberno será "responsable" co mantemento dos espazos públicos ou dos colexios, coas actuacións de accesibilidade no rural ou co acceso á vivenda, un problema "no que non nos poñeremos de perfil".
Ademais, Pontevedra volverá a confiar no deporte, nas festas e na cultura para avanzar na promoción da cidade cun "calendario vibrante" durante os doce meses do ano e apostando polo mercado de abastos como "tarxeta de visita" á cidade.
Así, ademais de eventos concretos, haberá un "salto cualitativo", defendeu Lores, co novo laboratorio da creatividade, as reformas do Principal e do Teatro Principal, a remodelación da Casa Azul ou a finalización da rehabilitación da residencia do Centro Sur.
As melloras nos campos de fútbol de Cerponzóns, Gatomorto e Marcón ou a nova nave de deportes náuticos das Corbaceiras serán algunhas das principais actuacións en materia de infraestruturas deportivas, avanza o documento municipal.
Lores: "O Estado non está a cumprir con Pontevedra como a cidade merece"
Na memoria destes orzamentos, o alcalde tamén reflexiona sobre a relación do Concello co resto das administracións, destacando a relación "correcta" e de colaboración institucional coa Xunta de Galicia que, segundo Fernández Lores, "está a dar froitos".
Así, o rexedor subliña os avances "significativos" coa variante de Alba ou os acordos alcanzados en materia de sanidade co Gran Montecelo e en vivenda pública. No saldo das "débedas pendentes", o alcalde cita a dragaxe do río Lérez.
Pola contra, Lores denuncia a "deriva" que tomaron as relacións coa Deputación, á que acusa de manter un trato financeiro "discriminatorio" con Pontevedra e, sobre todo, co Estado, do que lamenta que "non está a cumprir con Pontevedra como a cidade merece".
O alcalde censura a "parálise" en actuacións que considera vitais para a cidade, entre outras, a reforma do nó de Bombeiros, a mellora da autovía a Marín ou a continuidade do paseo peonil pola beira da ría ata Os Praceres.
Engade Pontevedra Viva como fonte preferida de Google de balde
Mantente informado coas últimas noticias de actualidade.