'Fumata branca' entre BNG e PSOE. Ambos os partidos chegaron a un acordo, tras meses de negociacións, para aprobar o orzamento municipal de 2026.
Estas contas, que segundo Miguel Anxo Fernández Lores e Iván Puentes, nacen dun acordo "pleno, amplo e global" entre nacionalistas e socialistas, ascenderán inicialmente aos 103.768.000 euros, un 5,21% máis que en 2025.
Máis aló de ser a cifra máis alta da historia de Pontevedra, cinco millóns máis que o exercicio anterior, o alcalde destacou que este orzamento permitirá "seguir avanzando de facer de Pontevedra un referente en moítisimas cousas".
"Isto vai a ser bo para Pontevedra", subliñou Fernández Lores, quen tras agradecer a disposición do PSOE ao diálogo, defendeu que este orzamento é un "exercicio de responsabilidade" que prioriza o "interese xeral" da cidadanía.
Un ano máis, os gastos correntes en bens e servizos levan gran parte do orzamento, até un 52% (54,69 millóns), sobre todo polo incremento do contrato de residuos, do servizo de axuda no fogar ou por novos estudos de mobilidade.
Aumentarán ademais as partidas para o mantemento urbano e rural, colexios e fontes, para a sinalización de vías públicas, para a iluminación do Nadal (45.000 euros máis) ou para programas de vivenda, igualdade e medio ambiente.
Outros 29,41 millóns, un 1,99% máis que en 2025, será para o capítulo de persoal, debido á creación de novas prazas, entre elas catro policías locais -un como inspector principal-, unha traballadora social ou un sarxento de bombeiros.
En materia de investimentos reais, Pontevedra disporá en 2026 de 14,97 millóns de euros, o que supón un incremento do 24,37% con respecto ao ano anterior.
O pavillón de Monte Porreiro (2,33 millóns), a iluminación da zona norte e centro (2,32 millóns), o parque da Parda (2,11 millóns), a reforma de Rosalía de Castro (1,86 millóns) e o 'destape' do Gafos (1,83 millóns) encabezan as actuacións.
Tamén haberá partidas para a humanización de Casimiro Gómez, a Rúa do Outeiro ou a Rúa das Pereiras, para actuacións nos campos de fútbol de Cerponzóns, Gatomorto e Marcón ou para melloras no Teatro Principal ou o centro sociocultural de Acevedo.
Para Iván Puentes, este acordo "redunda nos intereres dos cidadáns" e permitirá que o Concello funcione "con plena normalidade" e poida dispor de fondos "para afrontar os retos que Pontevedra ten por diante".
Explicou que os socialistas apostaron por catro eixos básicos nestas contas, que fora a barrios e parroquias "gran parte" dos investimentos, a mellora dos servizos públicos, afrontar o reto da vivenda e fomentar o desenvolvemento económico da cidade.
O pacto entre BNG e PSOE inclúe así medidas que os socialistas aseguran que levan o seu selo como os proxectos para a humanización de Augusto García Sánchez e Juan Bautista Andrade ou a rehabilitación integral da Casa Azul.
Un centro de día para persoas de espectro autista, a posta en valor do conxunto escultórico da Illa das Esculturas, o parque infantil na Rúa Serra ou a recuperación dos terreos do antigo vertedoiro do Rapadiño están entre as súas propostas.
A elas suman diversas melloras en colexios públicos, entre eles Froebel e A Xunqueira 2, un plan de asfaltados en camiños de Campañó, Alba, Bora ou Lérez, unha campaña contra o abandono animal ou a recuperación do arboledo en Loureiro Crespo.
Ambos os dirixentes criticaron ademais que, a pesar de ofrecerllo, o PP non quixera facer ningunha achega a este orzamento. "Os cidadáns non terán nada que agradecerlle a Rafa Domínguez", sinalou Puentes.
"O PP é a nada", engadiu o alcalde de Pontevedra, que sinalou que a "inoperancia" dos populares "non é boa para esta cidade". Afirmou que de propostas "serias e sensatas" do PP para que a cidade avance "non hai nada".
O obxectivo agora é que este orzamento municipal de 2026 poida aprobarse "o antes posible", aínda que os dous líderes recoñecen que será difícil que poida ser no pleno de febreiro porque os técnicos municipais deben emitir aínda os seus informes.