O cemiterio parroquial de San Vicenzo de Cerponzóns incorporará este domingo 5 de xullo o primeiro dispositivo de código QR nun panteón familiar.
Esta medida tecnolóxica pretende facilitar aos visitantes e familiares o acceso directo á historia, traxectoria e información das persoas finadas.
A proposta de instalar estes códigos en idioma galego procede da Asociación de Funcionarios para a Normalización Lingüística de Galicia.
Segundo explicou o secretario da asociación veciñal O Chedeiro, Juan José Esperón, preténdese que as familias poidan ampliar a memoria dos seus defuntos alén da inscrición que figura de forma habitual nas lápidas.
Este paso supón a continuación das accións iniciadas no mesmo espazo en agosto de 2025. Naquela ocasión, o propio Juan José Esperón impulsou un acto de restitución lingüística no panteón da súa familia, os rexentes da antiga Taberna da Rons.
Aquela intervención consistiu na substitución de tres lápidas escritas en castelán por outras novas redactadas en lingua galega, co obxectivo de reflectir a identidade e o idioma no que viviran os seus antepasados.
Coa implantación do novo sistema QR, a veciñanza quere difundir o patrimonio local e tamén o recordo familiar a través das novas tecnoloxías.