O CES (Colectivo Ecoloxista do Salnés) advirte das graves consecuencias que suporía desenvolver o SU-13 en Monte Faro, como ten previsto o Concello, ao ser un proxecto urbanístico que ameaza valores naturais, forestais, patrimoniais e culturais, segundo o informe presentado pola entidade.
Na súa análise, o CES lembra que xa en 2010 trasladou alegacións ao Informe de Sostibilidade Ambiental, aprobado polo Concello sen apenas modificacións, desoíndo recomendacións da Consellería de Medio Ambiente e sen que a Xunta interveña.
Para o CES, a creación de 1.400 vivendas en ringleira suporía un cambio irreversible na paisaxe, afectando ao mosaico agro-forestal e ao patrimonio cultural vinculado ás actividades rurais.
Ademais, consideran excesivo o consumo de solo urbanizable, especialmente nun concello cun crecemento demográfico estancado e unha demanda inexistente, que incrementaría a mobilidade insostible e o consumo enerxético, especialmente pola localización do SU-13 na zona alta do monte.
A entidade denuncia tamén o impacto hídrico, que se agrava polas secas estivais e polo aumento de demanda de auga para vivendas e campos de golf, que se contemplan na proposta, á vez que se minimiza a protección de ríos e acuíferos fronte aos fitosanitarios e alteracións da drenaxe.
O CES critica a recalificación do solo forestal a urbanizable, incumprindo informes contrarios da Xunta, así como a superación dos límites de densidade de vivendas establecidos pola normativa.
O colectivo ecoloxista alerta sobre a inacción da administración fronte ás irregularidades detectadas e cuestiona a reactivación de plans anulados xudicialmente, como o SU-14, que o Concello quere recuperar pese ás sentenzas contrarias e ao contexto de restricións de auga.
Finalmente, o CES conclúe que apostar por macro urbanizacións de segunda residencia supón perder un recurso forestal estratéxico.