Nova derrota xudicial do Concello de Sanxenxo en materia urbanística. O Tribunal Supremo rexeitou o recurso de casación presentado pola administración local contra a sentenza previa do Tribunal Superior de Xustiza de Galicia (TSXG) que anulou o proxecto urbanístico para construír 1.302 vivendas unifamiliares en Monte Faro, en Noalla.
O TSXG ditou unha sentenza en febreiro de 2015 invalidando a aprobación definitiva do Plan Parcial do Chan Urbanizable número 14, isto é, o proxecto para urbanizar a cima de Monte Faro. O Concello, como administración afectada porque aprobara o plan urbanístico no ano 2009, presentou un recurso ante o Tribunal Supremo, pero non se admitiu, o que implica que se confirma a sentenza previa.
Esta nova sentenza volve dar a razón ás teses do Colectivo Ecoloxista do Salnés, que empezou a batalla no ano 2010 e levou ata o TSXG o recurso contra o acordo do 28 de xullo de 2009 do Concello de Sanxenxo, cando gobernaba o PP con Catalina González como alcaldesa.
O Supremo, do mesmo xeito que antes o TSXG, anula o plan urbanístico alegando motivos paisaxísticos contra o proxecto da empresa Miradoiro de Sanxenxo, que contaba cun ditame negativo da memoria ambiental que non recomendaba o proxecto polo seu impacto paisaxístico, pero foi igualmente aprobado polo pleno da corporación.
"Non é aceptable que corresponda ao órgano promotor (...) cualificar as súas propias solucións ambientais -movidas obviamente polo lóxico desexo de mantemento por forza do plan parcial sometido a avaliación- como mellores que as ofrecidas na Memoria ambiental ou suficientes para enervar o efecto adverso dun informe desfavorable", indica o Supremo