Os centros educativos de Pontevedra transformáronse nas dúas últimas semanas en auténticos 'laboratorios verdes' nos que o alumnado puido coñecer a importancia ecolóxica e natural dos seus barrios.
Foi no marco da divulgación do proxecto RedeVerde Pontevedra que impulsa o Concello.
Así, este proxecto visitou os centros de ensino da cidade para identificar especies vexetais e animais do barrio, afondar na reciclaxe e compostaxe e concienciar da importancia de coidar os espazos públicos e naturais do concello.
Participaron nesta iniciativa o CEIP Álvarez Limeses, o CEIP Manuel Vidal Portela, o IES Luís Seoane, o CEIP Froebel, o CEIP San Martiño, o CEIP Parada-Campañó, o CEIP Vilaverde-Mourente, o CEIP Marcos da Portela e o CEIP de Cabanas.
Estes 'laboratorios verdes' permitiron ao alumnado explorar a biodiversidade local, identificando especies vexetais e animais presentes nos seus barrios e arredores e tamén participar en talleres de sostibilidade, aprendendo sobre reciclaxe, compostaxe e uso responsable dos recursos.
Puideron tamén descubrir a importancia dos espazos verdes urbanos, fomentando a creatividade e a conciencia ambiental desde idades temperás, e fomentar o traballo en equipo e a colaboración, achegando a ciencia e a natureza á vida cotiá da cidade.
O plan de sensibilización ambiental de RedeVerde Pontevedra ten como obxectivo achegar á cidadanía, especialmente aos máis novos, aos beneficios de integrar a natureza na cidade e promover hábitos respectuosos co medio ambiente.
O proxecto RedeVerde Pontevedra conta co apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación y Resiliencia (PRTR), financiado pola Unión Europea - NextGenerationEU.
Engade Pontevedra Viva como fonte preferida de Google de balde
Mantente informado coas últimas noticias de actualidade.