Persoal dunha empresa especializada iniciou este martes no xacemento da Lanzada os traballos de xeorradar cuxos resultados se incorporarán ao proxecto de musealización impulsada polo Ministerio de Fomento e a Deputación de Pontevedra.
O obxectivo desta actuación técnica é definir na súa totalidade a planimetría axustada dos restos non visibles que puidesen existir no subsolo, a fin de evitar posibles afeccións e protexer o conxunto cara ao desenvolvemento da próxima musealización.
Os traballos contaron cunha fase preparatoria que se desenvolveu en coordinación co Concello de Sanxenxo para a delimitación da área e a limpeza da zona que engloba unha superficie de 16.000 metros cadrados na parte máis próxima á terra e ao redor da zona principal onde se fixeron antigas escavacións.
O xeorradar non só permitirá analizar e facer un abano das estruturas existentes como a necrópolis, a salazón ou o poboado, senón que axudará tamén a delimitar elementos que puideran non estar localizados.
Estase a facer unha prospección xeofísica de investigación para obter a maior precisión e calidade na descrición, delimitación e caracterización dos elementos arqueolóxicos do xacemento e tamén unha prospección magnética coa que se poderán contextualizar aspectos concretos do xacemento, localizar e delimitar elementos como estruturas de combustión, niveis de destrución o estruturas defensivas.
Este traballo prolongarase ata o xoves e conta coa autorización de Patrimonio da Xunta e da comunidade de montes de Noalla. Os resultados incorporaranse con carácter divulgativo ao programa de musealización. O proxecto xa está redactado e atópase na fase de corrección para ser remitido á Dirección Xeral de Patrimonio.
A técnica do xeorradar se vén utilizando con excelentes resultados noutras zonas da provincia como é o caso de ata seis castros da zona do Deza, entre eles o de Toiriz en Silleda. Tamén está previsto desenvolver actuacións similares nos xacementos de Montaz en Silleda, e no Castriño de Bendoiro, en Lalín, castros enmarcados no convenio da Deputación de Pontevedra e o Consejo Superior de Investigaciones Científicas (CSIC).