O secretario xeral da Unión Comarcal de Comisións Obreiras de Pontevedra José Ramón Piñeiro anunciou que convocará aos traballadores de Parque de Maquinaria e da Imprenta provincial para "defender os servizos que prestan" xa que está convencido de que "a verdadeira intención do goberno da Deputación é desmantelar e privatizar" estas instalacións.
Segundo Piñeiro "trátase dunha decisión tomada desde o principio polo actual equipo de goberno como unha das condicións do pacto PSOE-BNG para gobernar a Deputación".
Desde Comisións Obreiras citan como "evidencias" desta "intención de desmantelar e privatizar" o "desinterese" en consolidar os postos de traballo a través dos procesos de estabilización do emprego dun bo número de traballadores do Parque, ou que a administración provincial non pedira unha nova concesión senón que solicite unha prórroga de tres anos ao departamento estatal de Costas polos terreos do Parque de Maquinaria e a Imprenta, situados en dominio público marítimo terrestre na Xunqueira de Alba.
Finalmente José Ramón Piñeiro reprochou ao goberno provincial que "teñan tomada unha decisión unilateral de ordeno e mando, moi prexudicial para os cidadáns polo incremento do gasto que isto supón, ao privatizar servizos esenciais da Deputación".
Engade Pontevedra Viva como fonte preferida de Google de balde
Mantente informado coas últimas noticias de actualidade.