A comisión extraordinaria de Benestar Social deu este martes luz verde ao novo convenio entre o Concello de Pontevedra e a FANPA para a xestión das ludotecas de verán e Nadal, que agora deberá ser aprobado polo pleno.
O acordo amplía a súa vixencia de dúas a catro anos, até 2030, e incorpora un incremento anual do 2,5% "para facer fronte á inflación e non quedar obsoleto".
O concelleiro de Cultura e Educación, Demetrio Gómez, explicou que o novo convenio conta cunha dotación superior aos 456.000 euros e que permite dar estabilidade a unhas ludotecas que cualificou de "apoio case imprescindible" para as familias pontevedresas.
No verán, o programa incluirá dez ludotecas, cinco no rural e cinco na cidade, unha delas obrigatoriamente en Monte Porreiro. Estas prazas están dirixidas, como mínimo, a 1.200 nenos e nenas de entre 3 e 12 anos.
En Nadal, a oferta reducirase a dúas ludotecas, unha en galego e outra en inglés, cuxa distribución a xestionará a propia FANPA.
Para acceder ao servizo, as persoas solicitantes deberán estar empadroadas en Pontevedra e estar escolarizadas en centros públicos.
No caso de que queden prazas libres, o varemo ampliarase. Tamén terán en conta a situación laboral de ambos os proxenitores e se son familias numerosas.
O ditame da comisión foi favorable con seis votos a favor, catro do BNG e dous do PSOE, e dúas abstencións do Partido Popular.
O convenio queda pendente do visto e prace definitivo do pleno municipal.