O Concello da Lama presentou este xoves o programa do Verán Cultural 2026, unha ampla proposta de actividades organizada a través da Oficina Municipal de Información Xuvenil (OMIX) coa que pretende ofrecer alternativas de lecer saudable, fomentar a participación veciñal e dinamizar a vida social e cultural do municipio durante os meses de xullo e agosto.
A presentación estivo encabezada polo alcalde, David Carrera, acompañado polo concelleiro de Cultura e Deportes, Plácido Pillado, e a concelleira de Igualdade e Servizos Sociais, Trindad Fernández.
O programa inclúe concertos, andainas, actividades deportivas, propostas infantís, citas intergeneracionales e accións de sensibilización social.
Carreira subliñou que esta programación responde o compromiso do goberno local de achegar a cultura, o deporte e o lecer a todo a veciñanza, convertendo os espazos públicos en lugares de encontro e convivencia.
Pola súa banda, Pillado destacou a aposta por unha programación "diversa e equilibrada", na que teñen cabida tanto a música en directo como as actividades deportivas, familiares e tradicionais, con propostas pensadas para todas as idades.
Trindad Fernández incidiu, ademais, na importancia de promover un programa inclusivo, orientado a reforzar valores como a convivencia, a igualdade e o envellecemento activo.
O calendario arrincará o venres 10 de xullo co concerto de Os Revenidas, que actuará ás 23:45 horas no Campo da Festa de Verducido. A música continuará o xoves 16 con Vanesa Muela e Banda Traka, na Praza da Pedreira, ás 21:30 horas.
Haberá tamén unha andaina circular por Xesta, o domingo 19 de xullo; o concerto da Banda Artística de Arcade, o día 26; e unha dobre xornada o luns 27, coa actuación da Banda de Música Municipal da Lama e unha exhibición de zumba solidaria.
O programa seguirá cun paseo en piragua polo río Verdugo, unha festa infantil con inchables, a actividade 'Aventuras dos 7 mares' e a Festa Oitentera, que se desenvolverá na Alameda.
Xa en agosto, o programa incluirá a actividade 'Verán de Lecer Consumo', o tradicional Xantar da Terceira Idade nas Ermidas, xogos acuáticos con Aquagames e o concerto final de Acorde Son do Verdugo, previsto para o 6 de agosto na Praza da Pedreira.
Engade Pontevedra Viva como fonte preferida de Google de balde
Mantente informado coas últimas noticias de actualidade.