Unha conferencia internacional debate en Pontevedra sobre a xestión comunitaria da auga no rural

Estes días, Pontevedra convértese no epicentro europeo do debate sobre a xestión da auga no medio rural. A Asociación de Traídas de Auga Coxapo organiza a Conferencia Internacional Acowas-Eu 2025, un evento que reúne a expertos de Austria, Irlanda, Dinamarca, Finlandia e España para reflexionar xuntos sobre os retos actuais que enfrontan as comunidades que autogestionan este recurso esencial.

Conxapo, que representa a nada menos que 85.000 usuarios de traídas de auga no rural galego, lidera este foro de intercambio de ideas centrado no cumprimento normativo e a sustentabilidade na xestión da auga potable.

O acto central do encontro tivo lugar este martes no Teatro Principal de Pontevedra, coa conferencia titulada "Xestión comunitaria da auga no rural". Alí déronse cita representantes de asociacións veciñais de traídas de auga, entidades públicas e privadas relacionadas co sector, así como académicos de universidades como Boku (Viena), Vigo, A Coruña e o Dundalk Institute of Technology (Irlanda).

Entre as institucións presentes destacaron a Consellería de Sanidade, Augas de Galicia e a Confederación Hidrográfica Miño-Sil, xunto con autoridades como Ángeles Vázquez, conselleira de Medio Rural e Cambio Climático; Luís López, presidente da Deputación de Pontevedra; e Miguel Anxo Fernández Lores, alcalde da cidade.

Durante a súa intervención, Ángeles Vázquez subliñou que a xeografía galega e a dispersión da súa poboación fan necesario combinar diferentes modelos para garantir tanto o abastecemento como o saneamento da auga. Neste sentido, Galicia non só conta coas traídas municipais, senón tamén con sistemas autogestionados por comunidades veciñais, especialmente en pequenos núcleos rurais.

A conselleira lembrou que o obxectivo de Augas de Galicia é que a auga potable e o saneamento cheguen a todos os recunchos, e anunciou que este ano se conceden axudas a 41 colectivos veciñais encargados de manter as súas propias traídas.

Pola súa banda, Luís López, presidente da Deputación, destacou o papel pioneiro da institución provincial no apoio a estas comunidades de usuarios, convertendo á provincia de Pontevedra en referente nacional en políticas sostibles de auga. En só dous anos, esta administración destinou máis de 4 millóns de euros a través de programas como +Aqua, Novaqua e os Premios +Aqua, para mellorar os sistemas de captación e subministración en diversos núcleos rurais.

A conferencia continúa este mércores 17 de setembro cunha xornada técnica privada, organizada en tres mesas de traballo: unha coas asociacións fundadoras de Acowas-Eu (a Alianza Europea de Servizos de Auga Comunitarios), outra con universidades, e unha terceira con representantes de administracións públicas. Pola tarde, os asistentes poderán coñecer de primeira man o funcionamento das traídas de Balteiro e Meira de Arriba, mediante visitas técnicas.