Conta atrás para 'Nymeria', o espectáculo inmersivo que abrirá a súa xira en Pontevedra

A un mes da estrea de Nymeria, a maquinaria artística e técnica da compañía Pablo Méndez Performances está en plena actividade.

Este luns 20 de outubro, artistas, técnicos, escenógrafos, deseñadores de vestiario, responsables de efectos visuais e creativos de distintas disciplinas reuníronse para ultimar os ensaios grupais do espectáculo, unha produción ambiciosa que promete levar o espectador a través dun universo fantástico e emocional sen precedentes.

A cita co público será o próximo 15 de novembro ás 20:00 horas no Auditorio Afundación de Pontevedra.

Cun elenco de once artistas profesionais en escena, algún procedente do Circo do Sol, e unha longa bagaxe no mundo do espectáculo, nestes días previos, o que se vive portas adentro na sede da compañía en Pontevedra é case tan fascinante como o que sucederá sobre o escenario.

"Esta é a fase na que se engrenan os números entre si", explica Pablo Méndez, director da compañía, produtor e codirector de Nymeria. "Hai unha parte de investigación moi forte detrás. Algúns elementos poden parecer coñecidos, pero lles damos unha volta para que teñan un novo significado. Iso implica unha investigación profunda para crear os números dende cero".

O resultado final será unha experiencia inmersiva que combinará teatro visual, circo contemporáneo, humor e tecnoloxía escénica avanzada, con proxeccións en 3D creadas mediante intelixencia artificial e un show de drons que interactúan cos artistas en escena.

A proposta está deseñada para que o espectador se converta en parte da tripulación dunha nave espacial que viaxa entre mundos máxicos ata alcanzar Nymeria, un destino onde todo é posible.

"Agora mesmo todos os equipos están montados e traballando na súa especialidade, pero logo ímonos mesturando para formar as distintas pezas do espectáculo", sinala Laura Chica, codirectora de Nymeria.

A creación deste espectáculo remóntase ao mes de marzo, e segundo Méndez, o reto foi dobre. Por unha banda, técnico –polas limitacións propias dun teatro fronte a unha gran carpa– e por outra, de confianza co público.

"A xente coñécenos por espectáculos gratuítos na rúa. Pero isto é outro nivel, cunha esixencia maior, o espectador paga a súa entrada e o artista comprométese a devolverlle a experiencia pola que pagou. É o soño de toda unha vida: que alguén compre unha entrada, sente nunha butaca, vibre co que creamos e saia satisfeito", afirma o responsable da compañía.

A elección de Pontevedra como cidade para a estrea non é casual. A compañía ten a súa sede no barrio de Lérez, nunhas instalacións que ocupan un baixo de máis de 3.000 m² entre as rúas Xoán Bautista Andrade e A Santiña. "Aínda que traballamos tamén a nivel internacional –a pasada fin de semana, parte do elenco actuou en París–, esta estrea tiña que ser aquí, onde temos a nosa base e onde a xente xa coñece o noso traballo na rúa", comenta o director de Pablo Méndez Performances.

Co 80% da capacidade vendida, as entradas poden adquirirse en Ataquilla.com para a estrea absoluta dunha xira que continuará en Burgos, Ourense, Vigo, Lugo, Ferrol, Vilagarcía de Arousa e Pola de Siero.

O show, recomendado para todos os públicos e cunha duración de 70 minutos, promete sorprender e emocionar. "Nymeria hai que vivila. A mensaxe e o significado desvélanse no propio espectáculo, cando te deixas levar pola experiencia, porque hai que sentila para entendela", conclúe Pablo Méndez.