O Entroido de Barro deste ano terá unha figura protagonista moi especial: o Corvo de Coralia.
Inspirado nun famoso corvo que viviu no lugar do Curuto e que, segundo contan, tiña o don da palabra, este personaxe simboliza o espírito burlón e festivo propio do Entroido.
O Concello de Barro quixo rescatar esta historia local para convertela no eixo central dunha programación cargada de tradición e novidades.
Segundo lembra a veciñanza do lugar, este corvo adoitaba chamar pola súa dona desde o alto do hórreo ao berro de "Coralia! Coralia! Coralia!".
Pero o máis sorprendente era cando, coa súa voz ronca, tamén chamaba polas galiñas berrando "Churras! Churras! Churras!", e estas acudían crendo que era a propia Coralia quen as chamaba para darlles de comer como facía habitualmente. O corvo, entón, recibíaas cunha gran gargallada.
O Corvo de Coralia representa á perfección o espírito do Entroido, unha festa milenaria onde a burla e a diversión son as protagonistas.
O alcalde, Xosé Manuel Fernández Abraldes, e o concelleiro de Cultura, Adrián Silva, presentaron unha programación que culminará coa despedida do Corvo de Coralia.
Ademais das actividades tradicionais, como a Corrida do Galo, o Festival de Disfraces e o Certame de Murgas, este ano inclúese unha nova proposta gastronómica: o Concurso de filloas e de orellas.