A tendencia descendente na incidencia da pandemia freouse na área sanitaria de Pontevedra e O Salnés que, nas últimas 24 horas, experimentou un novo repunte. Ata 29 novos contaxios sitúan os casos activos en 433. Son sete máis que onte.
O número de pacientes hospitalizados, segundo o balance do Servizo Galego de Saúde, mantense sen cambios. Hai 29 persoas ingresadas nos tres hospitais da área sanitaria.
A maior parte deles (13) están en planta, en Montecelo. Outros sete están a ser atendidos no Hospital do Salnés e non hai ningún no QuirónSalud Miguel Domínguez de Pontevedra.
Pola súa banda, hai nove pacientes ingresados na unidade de coidados críticos (UCI) de Montecelo. Son os mesmos que rexistraba o último balance de Sanidade.
O resto dos que contraeron o virus, outras 404 persoas, atópanse illadas nos seus domicilios e recuperándose baixo supervisión médica.
Desde o inicio da pandemia 13.458 pacientes da área sanitaria superaron a covid-19, 22 nas últimas 24 horas, e rexistráronse 175 falecementos asociados ao virus.
En canto á realización de probas PCR, fixéronse na área sanitaria de Pontevedra e O Salnés un total de 229.877, 846 nas últimas horas. Delas, 24 deron positivo (2,83%). A estas probas súmanse as 115.115 seroloxías realizadas ata a data.
INCIDENCIA EN GALICIA
A nivel autonómico a Dirección Xeral de Saúde Pública informa que o número de casos activos de coronavirus en Galicia é de 2.805, 16 máis que o día anterior. Deles 605 son da área da Coruña, 179 da de Lugo, 223 da de Ourense, 433 da de Pontevedra, 843 da área de Vigo, 435 da de Santiago e 87 da de Ferrol.
Do total de pacientes positivos, 37 están en UCI, 139 en unidades de hospitalización e 2.629 no domicilio. Por agora, en Galicia hai un total de 119.870 persoas curadas, rexistrándose 2.405 falecementos.
Desde o inicio da pandemia realizáronse en Galicia 2.179.656 probas PCR, 5.298 nas últimas 24 horas, que permitiron detectar a 105 novos infectados.