Vilagarcía de Arousa agarda un Nadal ateigado de actividades para todas as idades. O Concello ofrece unha ampla programación cultural e festiva que se desenvolverá en diversos espazos da cidade.
A programación comeza forte os días venres 12 e sábado 13 de decembro na Sala principal do Auditorio con "Amoriños", o espectáculo de Touriñán e Perdomo, que xa ten as entradas esgotadas.
Tamén o sábado 13, ás 20:00 h. na Sala de conferencias do Auditorio, terá lugar un Acto multidisciplinario en favor da paz, introducido polo escritor Anan Abdalah e acompañado polo pianista Juan Carlos Porto e o violín de Jorge Hortal, contando coa intervención da cantante Alba Rodríguez, a catedrática Laura Carballo e os xornalistas Alfonso Armada e Fernando Salgado.
A música de Nadal chegará o mércores 17 co Concerto de Nadal do Conservatorio Profesional de Música (20:00 h., Sala principal do Auditorio) e o xoves 18 co Tradicional Concerto de Nadal da Escola Municipal de Música Bernardo del Río (19:00 h., Salón principal do Auditorio), ambos con entrada de balde ata completar capacidade.
O venres 19 de decembro será unha xornada intensa. Ás 20:00 h. na Sala de conferencias do Auditorio, Julio Torrado presentará o seu libro "Tiro libre. Historias de deporte para falar de política". Á mesma hora, na Sala principal do Auditorio, o Centro Artístico Begoña Fontán presentará o espectáculo de danza "O crebanoces", con entradas a 6 euros.
Para os amantes do cinema, o Salón García acollerá ás 20:30 h. a proxección de "Kneeca" do Cine Clube Ádega, con prezos de 4 euros para non socios e 2,50 euros para entrada bonificada.
Os máis pequenos teñen unha cita o sábado 20 de decembro ás 17:30 h. na Sala principal do Auditorio con "Bibopapula. O espectáculo", unha aventura con cancións orixinais e efectos especiais, con entradas entre 10 e 15 euros.
ALDEA DE NADAL
A Aldea de Nadal será o punto referente da diversión dende o venres 19 de decembro ata o luns 5 de xaneiro.
Entre as actividades destacan a performance "Noite de Paz" con Máis Cantos e cantadas colectivas (venres 19), o "Nadal chef" con Rubén García, "Stonytime" con Kids&Us e o Cabaré infantil de Nadal con Nelson Quinteiro (sábado 20).
O domingo 21 haberá espectáculo de danza, concerto de Nadal con pintura en vivo e unha chocolatada de Zona Aberta con Gaiteiros do Nadal.
Os días seguintes, ata o 5 de xaneiro, a Aldea acollerá obradoiros de inglés, musicoterapia, panxoliñas, espectáculos infantís como "A nena lentella" de Olga Abad, animacións con ukeleles, pasarrúas de Papá Noel (24 de decembro).
Tamén están previstos espectáculos como "Radio Bule Bule" con Paco Nogueiras (sábado 27), Pakolas (domingo 28), concerto de Tino Baz (martes 30), clown "Bergamotto show" (venres 2 de xaneiro), monicreques "O crebanoces" (sábado 3 de xaneiro), "Barullo de Nadal" (domingo 4 de xaneiro) e un concerto de música de circo con Raúl Márquez (luns 5 de xaneiro).
Estas actividades desenvolveranse en rúas comerciais, na Aldea de Nadal, na praza de abastos, na praza da Peixería e na Praza de España.
A Biblioteca Municipal ofrecerá actividades como "Amoriños contei" (venres 12), "Sorrisos máxicos" (sábado 13), "No Nadal toca... maxia" (martes 23) e "Un Nadal cheo de contos" (martes 30).
No Recinto FEXDEGA, o FEXTURRÓN estará aberto dende o 28 de novembro ata o 11 de xaneiro, con pista de xeo e parque de atraccións e actividades, con horarios especiais para os días festivos.
O martes 30 de decembro, a Banda de Música de Vilagarcía ofrecerá o seu XVI Concerto de Fin de Ano na Sala principal do Auditorio (20:00 h.), dirixido por Suso Nogueira e coa solista Iria M.ª Caamaño Domínguez. As entradas terán un prezo de 4 ou 5 euros, dependendo da zona.
A despedida do ano terá lugar o mércores 31, a partir das 11.00 horas, na Praza de Ravella coa XXV Festa da Toma das Uvas, baixo o lema "Unha viaxe ao pasado para recibir o futuro", prometendo música, espectáculos e moitas sorpresas.
Finalmente, a maxia culminará o luns 5 de xaneiro coa tradicional Cabalgata de Reis.
As súas Maxestades de Oriente percorrerán as rúas da cidade a partir das 19:00 h., comezando na chaira do Auditorio e pasando pola avenida da Mariña, praza Dr. Carús, Alexandre Bóveda, Alejandro Cerecedo, Dr. Tourón, praza de España, Edelmiro Trillo, Padre Feijoo, Arapiles e rematando en Ravella.
O prazo para participar nas carrozas ábrese este martes 8 de decembro.
Ofértanse 60 prazas, 24 para rapaces de 7 a 9 anos de idade, e 36 para os que teñan entre 10 e 15 cumpridos.
A inscrición farase por orde de presentación no Rexistro Xeral, tanto presencial, nas oficinas do Concello, como telematicamente, a través da sede electrónica: sede.vilagarcia.gal
O formulario estará dispoñible na sede electrónica e na web municipal a partir do martes 9.