Analizar a posibilidade de avanzar en vías de cooperación que permitan reforzar os servizos públicos, algúns dos cales son comúns a ambos municipios, e reducir os seus custos de mantemento. Ese foi o obxectivo do encontro que mantiveron os alcaldes de Cuntis e Moraña.
Manuel Campos e José Cela puxeron sobre a mesa a situación do servizo de augas, que é compartido por ambos concellos, o posible arranxo da Ponte de Olimpio, que une ambos territorios, ou o Programa Integrado de Emprego, que comezará nas vindeiras semanas.
Ademais, os dous rexedores tamén analizaron diversas posibilidades de actuación conxunta noutros servizos públicos, xa que as contratacións ou desenvolvemento dos mesmos por parte dos dous territorios confiren maiores opcións de aforro para as arcas municipais.
Esta redución dos gastos, sinalaron ambos alcaldes, é moi necesaria especialmente no actual contexto e os negativos efectos socioeconómicos da crise sanitaria da covid-19.
"Moraña e Cuntis son pobos veciños, cunha gran relación, con moitas cousas en común e cun elevado grado de interactuación entre os nosos 9.000 veciños", explicou José Cela, que considera que o camiño da cooperación "é fundamental" para mellorar a vida da xente.