O pleno ordinario do Concello de Cuntis aprobou por maioría, e co rexeitamento do Partido Popular, a subida do prezo público do servizo de conciliación 'Cuntilín' e o da Escola Municipal de Música.
Un dos puntos máis debatidos foi o incremento no primeiro deles, xa que desde o goberno municipal achacan esta subida á "drástica redución da achega da Xunta de Galicia, que pasou de 105.000 euros a 55.000 euros", mentres que os populares culpan ao propio goberno de facer unha "xestión irresponsable".
Así mesmo, o pleno aprobou, co mesmo tipo de voto, a modificación da ordenanza fiscal reguladora do prezo público pola prestación do servizo na Escola Municipal de Música.
Este incremento, segundo sinalou o alcalde Manuel Campos, axudará a "paliar e actualizar os custos do servizo para así garantir a súa calidade e sustentabilidade de cara ao próximo curso".
REXEITAMENTO DO PARTIDO POPULAR
A portavoz municipal do PP de Cuntis, Isabel Couselo, púxolle cifras á subida de ambas as tarifas, sinalando que as familias pagarán ao ano 150 euros máis de media por cada neno que estea matriculado na formación musical e que empregue os programas de conciliación.
O PP "tentou por todos os medios frear a xeneralizada subida de impostos proposta polo alcalde socialista", ao considerar que "o grave problema económico do Concello xorde da xestión irresponsable do goberno" e "non débese solucionar cargándolle o problema aos veciños".
Ademais, critican que "o arranxo das contas municipais non pasa por subir impostos, senón por apostar pola contención do gasto superfluo, innecesario e desorbitado sen dilapidar centos de miles de euros en festas e celebracións".
Á súa vez, sinalan que a "exclusiva responsabilidade" deste incremento recae na "abstención do BNG, que preferiu porse á beira do alcalde no canto de defender aos veciños".
Din tamén que "o alcalde, para tranquilizar o malestar da xente, escudouse en que as cantidades que se cobrarán polos dous servizos son pequenas e alcanzables" polo que preguntan: "si tan pouco lle repercute ao Concello, non pode asumir ese suposto sobrecusto?", manifestou a concelleira popular.