A apertura dunha nova rede de camiños secundarios no sector II do proceso de concentración parcelaria da parroquia cuntiense de Troáns ponse en marcha. Promovido pola Consellería do Medio Rural e cun orzamento superior aos 200.000 euros, o proxecto ten como obxectivo dotar de novos e mellores accesos ás parcelas completando desta forma unha rede de viais secundarios que non foron previstos á hora de planificar os camiños principais.
A obra contempla a actuación nun total de 31 camiños. Nalgúns casos realizaranse novas aperturas e noutros, acondicionamento dos viais xa existentes. Despois da actuación toda a rede quedará uniformada cun firme adecuado e un ancho comprendido entre os 4 e 5 metros. A intervención contempla tamén a realización de cunetas, rozas e solución tanto de pendentes como de cambios de rasantes.
O proceso de concentración parcelaria desta zona de Troáns ocupa unha superficie total de 147 hectáreas distribuídas entre 614 propietarios, iniciouse no 1995 e atópase xa na súa fase final, próxima á toma de posesión por parte dos propietarios. Neste sentido, o alcalde Manuel Campos quixo destacar as xestións realizadas polo COncello nos últimos anos para axilizar o procedemento.