Un curso na UNED revisa a contaminación lumínica

Pontevedra
04 de febreiro 2025
Actualizado: 19:00

Celebrarase, de forma presencial e online, desde o luns 10 de febreiro ata o 31 de marzo. No curso abordarase a actual problemática ambiental, económica e de saúde derivada desta contaminación

Contaminación lumínica
Contaminación lumínica / Jan Huber - Unsplash

O Centro Asociado da UNED en Pontevedra organiza, do 10 de febreiro ao 31 de marzo, o curso "Fundamentos básicos da contaminación lumínica", un espazo formativo que aborda esta problemática ambiental, económica e de saúde.

A iniciativa, que se desenvolverá de forma presencial e on-line en directo ou en diferido, impartirase todos os luns de 20:00 a 21:30 horas durante 11 horas lectivas, cun custo de 29 euros por participante.

O curso estará dirixido por Iván Puente Luna, profesor-tutor do Centro, e coordinado por Rafael Cotelo Pazos, responsable do Departamento de Extensión Universitaria e Actividades Culturais da UNED en Pontevedra.

Como ponentes participarán Lucía Giráldez Costas, máster en Dirección e planificación do turismo; Cristina Rivas, formada en Dereito, asesora xurídica e técnica en Responsabilidade Social Empresarial; e Víctor Tilve Rúa, profesor-tutor CA Pontevedra, divulgador científico e licenciado e máster en Matemáticas pola USC.

Entre os obxectivos do curso destácase a definición da contaminación lumínica, o coñecemento das súas causas e consecuencias tanto no medio ambiente como na saúde humana, e a identificación de boas prácticas para evitala.

Os participantes aprenderán os parámetros físicos básicos da luz, a forma de medir o brillo do ceo nocturno e o uso de instrumentos para interpretar os resultados. Ademais, estudouse o impacto desta problemática no patrimonio cultural inmaterial vinculado á observación do ceo, así como o potencial do turismo astronómico para o desenvolvemento sostible dos territorios.

A contaminación lumínica, coñecida desde hai tempo pero obxecto de estudo intensivo nos últimos 15 anos, afecta ao aforro enerxético, contribúe á contaminación atmosférica, xera problemas de seguridade e ten repercusións na fauna, na flora e na saúde humana.

Este curso encadrase nos obxectivos da Axenda 2030 e pretende dotar a técnicos, responsables políticos, investigadores e ao público en xeral de ferramentas básicas para comprender e combater este desafío.