O Partido Popular de Pontevedra quixo contar con Daniel Lacalle, o gurú económico de Pablo Casado, para inaugurar o I Foro PontEmplea, un espazo de debate que os populares organizaron para falar de economía e creación de emprego.
En declaracións a PontevedraViva, Lacalle explicou que Pontevedra ten un "enorme potencial" económico e pode ofrecer unhas "oportunidades maravillosas" para o emprego xuvenil e feminino ou para "todo lo que tiene que ver" coa economía circular e innovación.
Pero para iso, dixo, o goberno municipal debe ser un "pilar fundamental" para canalizar ese crecemento económico "facilitando las cosas" aos emprendedores. Ese foi o consello fundamental que quixo ofrecerlle ao candidato do PP, Rafa Domínguez, o anfitrión deste foro de debate.
O economista, número 4 do PP madrileño ao Congreso, lembrou que en materia administrativa os concellos teñen "todas" as competencias, polo que instou a crear unha contorna "facilitadora" en cando a licenzas, aperturas ou a seguridade xurídica que deben ter aquelas compañías que queiran investir en Pontevedra.
A este respecto, sinalou que o que ocorreu con Ence é "claramente peligroso" non só para a compañía pasteira, porque "introduce inseguridad jurídica" a calquera outro negocio "al pensar que si tienes todos los permisos luego va a venir otro y te lo va a cambiar todo".
A administración municipal, engadiu Lacalle, debe ser "express" e adoptar todas as medidas necesarias para "hacer las cosas de manera fácil" para que se "destaponen" os problemas que pode ter calquera empresa "que venga a abrir negocios y crear empleo".
Este foro de debate terá continuidade o vindeiro xoves 11 de abril coa empresaria do sector vitivinícola, Marisol Bueno, e o presidente da Confederación de Empresarios de Pontevedra (CEP), Jorge Cebreiros, que serán os relatores que pecharán esta iniciativa.