O I Concurso Escolar contra a Violencia de Xénero convocado pola Subdelegación do Goberno en Pontevedra xa ten gañadores. O xurado mantivo este mércores a súa última reunión e seleccionou os 12 relatos e debuxos-pinturas gañadores entre o total de 509 traballos entregados: 312 traballos na categoría de debuxo-pintura e 197 traballos en relato curto.
A participación foi elevada a pesar de que se trata a primeira edición do concurso, pero, de todos os xeitos, os membros do xurado non só destacan a cantidade de traballos recibidos, senón a calidade dos mesmos e que se se desprende deles que os escolares participantes, que teñen idades adolescentes e preadolescentes (a partir de 12 anos), teñen "unha intensa concienciación ante o problema".
Os membros do xurado destacaron que nos relatos presentados os alumnos "maniféstanse moi esperanzados" e o final dos relatos, por unhas cousas ou por outras, é optimista, pois "son capaces de esnaquizar a sen razón para aparecer como liberada aquela muller ou mesmo aquela familia". Destacan, así mesmo, que se abordou a violencia de xénero e a igualdade deste moitas perspectivas diferentes, tanto desde a propia muller que a sofre como da súa familia ou dos nenos.
O concurso persegue un dobre obxectivo: fomentar a creación literaria e artística e impulsar a creatividade e a imaxinación e incrementar a concienciación e sensibilidade dos escolares ante a violencia de xénero. Desta forma, o xurado valorou que abordasen esta violencia social e a igualdade entre mulleres e homes.
Respecto diso, chama a atención que o xurado que valorou as propostas está composto por tres mulleres e máis do dobre de homes, sete. A preguntas dos medios, a subdelegada do Goberno en Pontevedra, Ana Ortiz, explicou que á hora de designar o xurado "non pensamos na paridade", senón que "pensamos que tanto os homes e as mulleres que estamos aquí representados somos xente que estamos moi entregados á causa sobre a violencia de xénero e non nos expuxemos se eramos homes ou mulleres".
O xurado presidiuno Ana Ortiz e confórmano a xefa da Unidade de Violencia sobre a Muller, María Paz Pérez; o xefe territorial de Educación en Pontevedra, César Pérez Ares; o inspector xefe de Educación en Pontevedra, Manuel Torres; os pintores Antón Pulido e Jaime Fariña Falcón; o catedrático, escritor e crítico literario José Montaña Louzao; o catedrático e inspector de Educación Modesto Hermida; e a profesora María José Tobar Quintanar. En opinión da subdelegada, "a categoría que teñen persoal e profesional fala por si soa, con independencia se son homes ou mulleres".
Os gañadores recibirán os seus premios nun acto que se celebrará na sede de Afundación de Pontevedra o venres 24 de novembro, véspera do Día Internacional contra a Violencia de Xénero. Presentarano os actores Luís Zahera e Pilar Castro, que actualmente están a rodar na provincia a nova serie de Telecinco Vivir sin permiso.
Consulta aquí os gañadores do I Concurso Escolar contra a Violencia de Xénero.